اقش پەن ءيزرايلدىڭ يرانعا قارسى شابۋىلى باستالعاننان كەيىن مۇناي باعالارى كۇرت كوتەرىلدى. لوندونداعى ICE Futures Europe بيرجاسىندا مامىر ايىنا ارنالعان Brent ماركالى مۇناي كەلىسىمشارتتارىنىڭ باعاسى 13,04%-عا ارتتى، دەپ حابارلايدى «ادىرنا» ءتىلشىسى.
كەشە كەشكە مۇنايدىڭ ءبىر باررەلىنىڭ باعاسى 82,37 دوللارعا جەتتى. استانا ۋاقىتىمەن تاڭعى 6:00-دە ءوسۋ قارقىنى 8,93%-عا باياۋلاپ، باعا 79,38 دوللارعا جەتتى. كەيىن كوتيروۆكالار 77–78 دوللارعا دەيىن ءتۇستى. وسىلايشا، نارىق بىرنەشە ساعات ىشىندە 6 دوللاردان استام دياپازوندى ءوتتى.
باعانىڭ تۇراقسىز بولۋىنا ورمۋز بۇعازى ارقىلى جەتكىزىلىمنىڭ توقتاپ قالۋ قاۋپى سەبەپ بولىپ وتىر. بۇل – يران مەن ومان اراسىنداعى ستراتەگيالىق تەڭىز ءدالىزى، ول ارقىلى الەمدىك مۇناي ساۋداسىنىڭ شامامەن 20%-ى جانە سۇيىتىلعان تابيعي گاز جەتكىزىلىمىنىڭ 30%-ى وتەدى.
يران بۇعاز ارقىلى ساۋدانى ءارى قاراي حابارلاما بەرىلگەنگە دەيىن توقتاتقانىن جاريالادى. Reuters اگەنتتىگىنىڭ دەرەگىنشە، كەم دەگەندە 150 تانكەر بۇعازعا كىرە الماي، قورشاۋعا ىلىنگەن.
ورمۋز بۇعازى ارقىلى كۇنىنە 17–20 ملن باررەل مۇناي وتەدى. ءتىپتى قوزعالىستىڭ ءىشىنارا توقتاۋى كۇنىنە 8–10 ملن باررەل تاپشىلىق تۋدىرۋى مۇمكىن، بۇل الەمدىك تۇتىنۋدىڭ شامامەن 10%-ىنا تەڭ. كوپتەگەن اناليتيكتەردىڭ پىكىرىنشە، ءتورت اپتاعا سوزىلعان قاقتىعىستا جەتكىزىلمەگەن مۇناي كولەمى 200–300 ملن باررەلگە جەتۋى مۇمكىن، ال باعا قىسقا مەرزىمدە باررەلىنە 80–120 دوللارعا دەيىن كوتەرىلۋى ىقتيمال.
