اتىراۋ قالاسىندا «ATYRAU VOLUNTEER FEST» ەرىكتىلەر فەستيۆالى وتۋدە. اۋقىمدى ءىس-شاراعا ءوڭىردىڭ 1000-عا جۋىق ۆولونتەرى مەن بەلسەندى جاستارى، سونداي-اق حالىقارالىق جانە وتاندىق ۇيىم وكىلدەرى جينالدى.
فەستيۆالدىڭ باستى ەرەكشەلىكتەرىنىڭ ءبىرى – سپيكەرلەرمەن اشىق فورماتتاعى كەزدەسۋلەر. كۇنى بويى ءتۇرلى سالا ماماندارى مەن قوعام وكىلدەرى جاستارمەن تاجىريبە الماسىپ، وزەكتى تاقىرىپتاردى تالقىلاۋدا.
العاشقى سەسسيادا بۇۇ بالالار قورى (UNICEF) جاستارمەن جۇمىس كوورديناتورى شاربانۋ نۇرعازى جانە قوعام بەلسەندىسى، IT-كاسىپكەر الپامىس جاريلكاسينوۆ ءسوز سويلەدى. سپيكەرلەر ۆولونتەرلىكتىڭ جاھاندىق دەڭگەيدە دامىپ، جاستاردىڭ كوشباسشىلىق قابىلەتى مەن ازاماتتىق جاۋاپكەرشىلىگىن قالىپتاستىرۋعا ىقپال ەتەتىنىن اتاپ ءوتتى.
كەلەسى كەزدەسۋدە بۇۇ ەرىكتىلەر باعدارلاماسىنىڭ تمد ەلدەرى بويىنشا سەرىكتەستىك مامانى نۇراي مامىتوۆا، «جاستار رۋحى» جاستار قاناتىنىڭ توراعاسى اقەركە نۇرعاليقىزى جانە كينورەجيسسەر، جۋرناليست ءاليا ءاشىم قاتىسىپ، جاستارعا جەرگىلىكتى جانە حالىقارالىق دەڭگەيدەگى ۆولونتەرلىككە قاتىسۋ مۇمكىندىكتەرى بار ەكەنى، ونىڭ تاجىريبە جيناۋ مەن كاسىبي دامۋعا جول اشاتىنىن ايتتى.
ءىس-شارادا وبلىس اكىمىنىڭ ورىنباسارى دارىن شامۇراتوۆ الداعى ۋاقىتتا دا ۆولونتەرلىك باستامالاردى قولداپ، اۋقىمىن كەڭەيتۋگە كۇش سالاتىنىن ايتتى.
– بۇگىندە اتىراۋ وبلىسىندا ۆولونتەرلىك قوزعالىس جۇيەلى تۇردە دامىپ كەلەدى. وڭىردە مىڭعا جۋىق ەرىكتى جاس پەن 150-دەن استام كۇمىس ۆولونتەر، 30 ۇكىمەتتىك ەمەس ۇيىم تىركەلگەن، ونىڭ 12-ءسى بەلسەندى. بۇدان بولەك، 4 باستاماشىل توپ جۇمىس جاساۋدا. بۇل جاستاردىڭ قوعام ومىرىنە بەلسەندى ارالاسىپ، الەۋمەتتىك جاۋاپكەرشىلىكتى سەزىنەتىنىن كورسەتەدى، – دەدى د. شامۇراتوۆ.
كەشكى سەسسياعا ۇلتتىق ۆولونتەرلىك جەلىسىنىڭ فرونت-وفيس باسشىسى ايبەك دوسىمبەتوۆ پەن پسيحوفيزيولوگ، نەيروپسيحولوگ ابدراشيت تۇلكىبايدىڭ قاتىستى.
فەستيۆال اياسىندا حالىقارالىق جانە جەرگىلىكتى 15-كە جۋىق ۇيىم ءوز قىزمەتىن كورمە فورماتىندا تانىستىرۋدا. قاتىسۋشىلار ەكولوگيا، مەديتسينا، الەۋمەتتىك كومەك، توتەنشە جاعدايلار جانە جانۋارلارعا قولداۋ كورسەتۋ باعىتتارىنداعى جوبالارمەن تانىسۋدا.
فەستيۆال كەشكى ساعات 22:00-گە دەيىن جالعاسىپ، گالا-كونتسەرتپەن قورىتىندىلانادى. كەشتىڭ حەدلاينەرى – تانىمال ورىنداۋشى ARO.
ءىس-شارا اتىراۋ وبلىسى ىشكى ساياسات باسقارماسىنىڭ قولداۋىمەن «جاستار رۋحى» جاستار قاناتىنىڭ وبلىستىق فيليالىنىڭ ۇيىمداستىرۋىمەن وتۋدە.
