تسەرەبرالدى سال اۋرۋى، پسيحيكالىق دامۋدىڭ تەجەلۋى، سيرەك كەزدەسەتىن گەنەتيكالىق جانە وزگە دە دەرتتەرگە شالدىققان بالالار مەن ەرەسەكتەر الماتى وبلىسى تالعار اۋداندىق مادەنيەت ۇيىندە وتكەن «جۇرەكتەن جۇرەككە» اتتى وبلىستىق شىعارماشىلىق فەستيۆالىنە قاتىستى.
ءىس-شاراعا قاتىسۋشىلارعا جاس شەكتەۋى قويىلعان جوق. ىرىكتەۋ كەزەڭدەرىنەن وتكەن وبلىس تۇرعىندارى وزىنە دەگەن سەنىمدىلىكتى، كۇش-جىگەر مەن ومىرگە دەگەن شىنايى سۇيىسپەنشىلىكتى پاش ەتىپ، ءبىر ساحنادا ونەر كورسەتتى.
مىسالى، جامبىل اۋدانىنان كەلىپ قاتىسقان اكبوتا جالعاسباي مەن بەكجان بازارقۇلدىڭ ورىنداۋىنداعى «اعا مەن قارىنداس» ءانى كورەرمەندەرگە ەرەكشە اسەر سىيلادى. بۇل دۋەت دوستىق پەن ءوزارا تۇسىنىستىكتىڭ، شابىت پەن باۋىرمالدىقتىڭ سيمۆولىنا اينالدى.
فەستيۆالدىڭ ەڭ جاس قاتىسۋشىسى كوناەۆ قالاسىنان كەلگەن جەتى جاستاعى دياس قۋاندىق بولدى. ونىڭ ونەرى مەن ءوزىن ساحنادا ۇستاي ءبىلۋى كورەرمەندەردىڭ جۇرەگىن ەلجىرەتىپ، جۇرەكتەن جۇرەكتەرگە جەتتى.
فەستيۆالدى الماتى وبلىسىنىڭ اكىمدىگى مەن وبلىستىق حالىق شىعارماشىلىعى ورتالىعى بىرلەسە ۇيىمداستىردى. شارانىڭ سالتاناتتى اشىلۋىندا وبلىستىق ءماسليحات توراعاسى قۋات بايعوجاەۆ پەن تالعار اۋدانىنىڭ اكىمى تاڭات ايداربەكوۆ قۇتتىقتاۋ ءسوز سويلەپ، مۇنداي باستامالاردىڭ ەرەكشە قاجەتتىلىكتەرى بار جانداردىڭ شىعارماشىلىق الەۋەتىن اشۋعا جانە قوعام ومىرىنە بەلسەنە ارالاسۋىنا مۇمكىندىك بەرەتىنىن، سونداي-اق قوعامداعى مەيىرىمدىلىك پەن ءوزارا سۇيىسپەنشىلىكتى ارتتىرۋعا زور ىقپال ەتەتىنىن ايتتى.
بارلىق قاتىسۋشىلار وبلىس اكىمى مارات سۇلتانعازيەۆتىڭ اتىنان العىس حاتتارمەن ماراپاتتالدى، سونداي-اق شىعارماشىلىق ۇيىرمەلەردى ۇيىمداستىرۋشىلار ۇسىنعان اقشالاي ىنتالاندىرۋلار مەن ەستەلىك سىيلىقتار الدى.
