ءماجىلىس دەپۋتاتى ەربولات ساۋرىقوۆ ەرەكشە بالالاردىڭ اتا-انالارىنا ءتىل تيگىزگەن بلوگەردى قاتاڭ جازالاۋ كەرەكتىگىن ايتتى، دەپ حابارلايدى «ادىرنا» ءتىلشىسى.
«ازاماتشانى قىلمىستىق جازاعا تارتۋ كەرەك. ەگەر اكىمشىلىك جازامەن قۇتىلاتىن بولسا، ول ەكىنشى رەت وسىنداي جاعدايدىڭ قايتالانۋىنا سەبەپتى بولادى»،-دەدى ول.
دەپۋتات ءوزىنىڭ دە ەرەكشە بالا تاربيەلەپ وتىرعانىن جەتكىزدى.
«كىشى قىزىم ەرەكشە جاعدايداعى بالا. ءبىز دە وسىنداي بالا ءوسىرىپ وتىرعان سوڭ اتا-انالاردىڭ پسيحولوگياسىن، ومىرگە كوزقاراسىن وتە جاقسى بىلەمىز. سوندىقتان ونداي اتا-انالاردى ەرەكشە قورعاۋعا الۋ كەرەك. ەرەكشە بالانى تاربيەلەپ وتىرعانداردى ەلدىڭ ءبارى تۇسىنە بەرمەيدى. مەن بۇنى جاقسى بىلەمىن. بۇنداي اتا-انالارعا ەرەكشە قولداۋ قاجەت. مەنىڭ ويىمشا، پەتيتسيا جيناۋدىڭ ەشقانداي قاجەتتىلىگى جوق. پەتيتسياسىز-اق ءبىزدىڭ قۇقىق قورعاۋ ورگاندارى تۇبەيلى شەشىم قابىلداۋى ءتيىس. ەگەر اكىمشىلىك جازامەن شەكتەلەتىن بولسا، بۇل ماسەلەگە ءوزىم دە ارالاساتىن بولامىن»،-دەپ قوستى ساۋرىقوۆ.
بۇعان دەيىن استانادا پوليتسيا الەۋمەتتىك جەلىلەردە مۇمكىندىگى شەكتەۋلى بالالاردىڭ اتا-انالارىن قورلايتىن سوزدەر ايتىلعان ۆيدەونى تاراتقان بلوگەردى ۇستاعان ەدى. پد مالىمەتىنشە، ۇساق بۇزاقىلىق فاكتىسى بويىنشا اكىمشىلىك ءىس قوزعالىپ، ماتەريالدار سوتقا دايىندالىپ جاتىر.
