اتىراۋ وبلىسىندا كوكتەمدە سۋ باسۋى مۇمكىن 34 ەلدى مەكەن بار.
وبلىستىق توتەنشە جادايلار دەپارتامەنتىنىڭ ءبولىم جەتەكشىسى بەرىك قۇرماناليەۆتىڭ ايتۋىنشا، دەپارتامەنت وكىلدەرى رەسەي فەدەراتسياسىنىڭ استراحان، ۆولگوگراد جانە ورەنبۋرگ وبلىستارىنىڭ باس باسقارمالارىمەن تىعىز قارىم-قاتىناس ورناتقان. سونىڭ ىشىندە گيدرولوگيالىق رەجيم بويىنشا دا مالىمتتەر الماسىپ وتىرۋ جۇمىستارى جاقسى جولعا قويىلعان. ال قازىر كوكتەم شىقتى، قار ەندى ەرىپ جاتىر. سوندىقتان سۋ تاسقىنىنىڭ قاۋپى ءالى الدا.
اتىراۋ وبلىسىنىڭ اۋماعىندا 1 قالا مەن 4 اۋداندى، 34 ەلدى مەكەندى، 27258 ادام تۇرىپ جاتقان 8474 تۇرعىن ءۇيدى سۋ باسۋ قاۋپى ءتونىپ تۇر. جەرگىلىكتىڭ جانە رەسپۋبليكالىق ماڭىزداعى ۇزىندىعى 166 كم-ءدى قۇرايتىن 28 قاۋىپتى جول ۋچاسكەلەرى بار.
بەرىك قۇرمانعاليەۆتىڭ حابارلاۋىنشا، سۋ تاسقىنىنىڭ سالدارىن جويۋ ءۇشىن 8 461,1 توننا جانار-جاعارماي، 1947 توننا ينەرتتى ماتەريالدار، 40 مىڭعا جۋىق قاپ، 45 شاتىر مەن 6358 كورپە-توسەگى بار كەرەۋەتتەر دايىندالعان.
