فوتو: olympic.kz
قازاقستان كۇرەس فەدەراتسياسى مەن United World Wrestling اراسىندا تاريحي مەموراندۋمعا قول قويىلدى. ەندى ەلىمىزدە الەمدىك دەڭگەيدەگى بالۋانداردى دايارلايتىن بىرەگەي ورتالىق جۇمىس ىستەيتىن بولادى، دەپ حابارلايدى "ادىرنا".
جاڭادان اشىلاتىن كۇرەس اكادەمياسى UWW تاراپىنان جوعارى تيىمدىلىك ورتالىعى رەتىندە تانىلعان زاماناۋي كەشەن بولماق.
مۇندا سپورتتىڭ بىرنەشە ءتۇرى قامتىلادى:
- گرەك-ريم جانە ەركىن كۇرەس;
- ايەلدەر كۇرەسى;
- جاعاجاي كۇرەسى.
اكادەميانىڭ باستى ەرەكشەلىگى – ونىڭ قۇرىلىمىندا ارنايى مەديتسينالىق جانە سپورتتىق-عىلىمي زەرتحانالاردىڭ بولۋى. بۇل بالۋانداردىڭ فيزيكالىق دايىندىعىن عىلىمي نەگىزدە باقىلاپ، جاراقاتتاردىڭ الدىن الۋعا مۇمكىندىك بەرەدى.
UWW پرەزيدەنتى نەناد لالوۆيچ پەن ەلىمىزدىڭ كۇرەس فەدەراتسياسىنىڭ باسشىسى ەركىن وقاسوۆ فەدەراتسيانىڭ جاڭا كەڭسەسىن تانىستىردى. كەڭسە ىشىندە قازاق كۇرەسىنىڭ داڭق زالى اشىلدى.
ەكسپوزيتسيادان قازاقستاندىق چەمپيونداردىڭ وليمپيادا ويىندارى مەن الەم بىرىنشىلىكتەرىندە يەلەنگەن جۇلدەلەرىن، بەلبەۋلەرىن جانە جەكە مۇراعاتتىق جادىگەرلەرىن كورۋگە بولادى.
ساپار بارىسىندا قوناقتار استانا مەن الماتىنىڭ سپورتتىق نىساندارىن، سونىڭ ىشىندە جاقسىلىق ۇشكەمپىروۆ اتىنداعى جەكپە-جەك سارايىن ارالادى. نەناد لالوۆيچ قازاقستانداعى سپورت ينفراقۇرىلىمىنىڭ دامۋ قارقىنىنا جوعارى باعا بەرىپ، ىنتىماقتاستىقتى نىعايتۋعا دايىن ەكەنىن جەتكىزدى.
