جامبىل وبلىسىنىڭ ينۆەستيتسيالىق تارتىمدىلىعى ارتىپ، ءىرى جوبالار ءساتتى جۇزەگە اسۋدا.
مەملەكەت باسشىسى قاسىم-جومارت توقاەۆ قازاقستان حالقىنا جولداۋىندا ينۆەستيتسيالىق ساياساتقا باسىمدىق بەرىپ، وڭدەۋ ونەركاسىبىنە قارجى تارتۋ، ءىرى ينۆەستورلارمەن قاتار شاعىن جانە ورتا جوبالاردى قولداۋ، ولارمەن جۇيەلى قارىم-قاتىناس ورناتۋ مىندەتتەرىن جۇكتەگەن بولاتىن.
وڭىردە وسى باعىتتاعى جۇمىستار قارقىندى جۇرگىزىلۋدە. 2025 جىلدىڭ العاشقى جارتىجىلدىعىندا نەگىزگى كاپيتالعا تارتىلعان ينۆەستيتسيا كولەمى 301,8 ملرد تەڭگەنى قۇراپ، وتكەن جىلمەن سالىستىرعاندا 48,1%-عا ارتتى.
بيىل جالپى قۇنى 175,2 ملرد تەڭگەنى قۇرايتىن 30 جوبا جۇزەگە اسىرىلىپ، 1 500 جاڭا جۇمىس ورنى اشىلادى دەپ كۇتىلۋدە.
ال 2023–2024 جىلدارى قۇنى 289 ملرد تەڭگە بولاتىن 48 جوبا پايدالانۋعا بەرىلدى. ولاردىڭ قاتارىندا «شاتىركول» كەن بايىتۋ فابريكاسى، «KORCEM» تسەمەنت زاۋىتى جانە «Karatau Chemicals» كاسىپورنى بار.
ينۆەستورلارعا قولايلى جاعداي جاساۋ ءۇشىن تاراز قالاسىنداعى يندۋستريالدى ايماق تولىق ينفراقۇرىلىممەن قامتىلىپ، الداعى جىلى شاعىن ونەركاسىپتىك ايماق ىسكە قوسىلادى. مۇندا ەسىك شىعارۋ، شىنى ءوندىرۋ، تامشىلاتىپ سۋارۋ جۇيەلەرى، قۇرعاق قۇرىلىس قوسپالارى مەن بەتون بۇيىمدارىن وندىرەتىن كاسىپورىندار اشىلادى. سونىمەن قاتار اۋدانداردا تالاس، سارىسۋ-1, سارىسۋ-2, مەركى جانە قۇلان سۋبايماقتارى قۇرىلۋدا.
قايتا جاڭعىرعان «Jibek Joly» ارنايى ەكونوميكالىق ايماعى بۇگىندە ءىرى جوبالار جۇزەگە اسىرىلىپ جاتقان ورتا ازياداعى بىرەگەي وندىرىستىك الاڭعا اينالدى. اەا اۋماعى 805 گەكتارعا ۇلعايىپ، قوسىمشا 400 گەكتارلىق سۋبايماق اشىلدى. مۇندا جەل گەنەراتورلارى زاۋىتىنىڭ العاشقى كەشەنى ىسكە قوسىلدى. سونداي-اق جۇگەرىنى تەرەڭ وڭدەيتىن ورتا ازياداعى ەڭ ءىرى كاسىپورىن، جىلىنا 3 ملن توننا تەمىر بۇيىمدارىن شىعاراتىن مەتاللۋرگيالىق زاۋىت قۇرىلىسى ءجۇرىپ جاتىر.
بۇدان وزگە، وندىرىستىك كرەمني، سۋتەگى اسقىن توتىعى، جەلاتين، موتوتەحنيكا جانە ناتري ءتسيانيدىن وندىرۋگە باعىتتالعان جاڭا جوبالار جۇزەگە اسىرىلۋدا.
ال قاراشا ايىندا جىلىنا 800 مىڭ توننا كۇكىرت قىشقىلىن شىعارا الاتىن «ەۆروحيم قاراتاۋ» جشس-ءنىڭ ءىرى ءوندىرىسىنىڭ العاشقى كەزەڭى ىسكە قوسىلادى دەپ كۇتىلۋدە.
