قىرعىزستاننىڭ جوگوركۋ كەنەش سپيكەرى نۇرلانبەك تۇرعىنبەك ۋلۋ پارلامەنتتى تاراتۋ جونىندە 32 دەپۋتات قول قويعان ۇسىنىس تۇسكەنىن مالىمدەدى، دەپ حابارلايدى «ادىرنا» ءتىلشىسى.
ءوزىن-ءوزى تاراتۋ باستاماسىن ۇسىنعان دەپۋتاتتار توبى سپيكەرگە جولداعان حاتىندا كەزەكتى پارلامەنتتىك سايلاۋ 2026 جىلدىڭ قاراشاسىندا، ال پرەزيدەنتتىك سايلاۋ 2027 جىلدىڭ قاڭتارىندا وتەتىنىن، ورتالىق سايلاۋ كوميسسياسى وسىنداي قىسقا مەرزىمدە ەكى ساياسي شارانى قاتار وتكىزە المايتىنىن جازعان.
نۇرلانبەك تۇرعىنبەك ۋلۋ بۇل باستامانى قولدايتىنىن ايتىپ، ەكى سايلاۋدىڭ قاتار ءوتۋى ەلگە ساياسي جانە ەكونوميكالىق قيىندىقتار اكەلەتىنىن جەتكىزدى.
«كونستيتۋتسياعا سايكەس، جوگوركۋ كەنەشتى ەشقانداي سىرتقى كۇش — پرەزيدەنت تە، اتقارۋشى بيلىك تە تاراتا المايدى. پارلامەنت تەك ءوزىن-ءوزى تاراتا الادى. ارنايى باستاماشىل توپ قۇرىلىپ، ورىندى سەبەپتەردى نەگىز ەتىپ، ماعان ۇسىنىس ەنگىزدى. قاجەتتى تاپسىرمالار بەرىلدى، جۇمىس ءجۇرىپ جاتىر. مەن توپتىڭ دالەلدەرىمەن تولىق تانىستىم. ولاردىڭ ۋاجدەرىندە نەگىز بار»، — دەدى ول.
ەرەجەگە سايكەس، جوگوركۋ كەنەشتىڭ ءوزىن-ءوزى تاراتۋ باستاماسىن دەپۋتاتتاردىڭ كەمىندە ۇشتەن ەكىسى، ياعني 60-تان استام دەپۋتات قولداۋى قاجەت. ءوزىن-ءوزى تاراتۋ تۋرالى شەشىم قابىلدانعان جاعدايدا پرەزيدەنت بەس كۇننىڭ ىشىندە كەزەكتەن تىس سايلاۋ تاعايىنداۋى ءتيىس.
