وتكەن اپتا ىشىندە ەلدىڭ ءتۇرلى وڭىرلەرىندە ەسىرتكى قىلمىستارىنا قارسى ءىس-قيمىل بولىنىستەرىنىڭ قىزمەتكەرلەرى ەسىرتكىنىڭ زاڭسىز اينالىمىنا قاتىستى بىرقاتار قۇقىقبۇزۋشىلىقتى انىقتاپ، جولىن كەستى، دەپ حابارلايدى “ادىرنا”.
جالپى 83 ەسىرتكى قىلمىسى انىقتالدى، ونىڭ ىشىندە:
- 63 وتكىزۋ دەرەگى;
- اسا ءىرى كولەمدە ساقتاۋدىڭ 8 دەرەگى;
- 1 ۇيىمداسقان قىلمىستىق توپ; قۇرامىندا ەسىرتكىسى بار وسىمدىكتەردى ءوسىرۋدىڭ 7 فاكتىسى.
تاركىلەنگەن ەسىرتكى زاتتارىنىڭ جالپى كولەمى 750 كەلىدەن استى، ونىڭ ىشىندە 6 كەلىدەن استام سينتەتيكالىق زاتتار الىندى، بۇل "قارا نارىقتاعى" 18 مىڭنان استام دوزاعا تەڭ.
باتىس قازاقستان وبلىسىندا پوليتسيا قىزمەتكەرلەرى اتىراۋ قالاسىنان a-pvp سينتەتيكالىق ەسىرتكىسىنىڭ ءىرى پارتياسىن الىپ كەلگەن 20 جانە 37 جاستاعى ەكى ەر ادامدى ۇستادى. تەرگەۋ بارىسىندا كۇدىكتىلەردىڭ ءبىرىنىڭ تۇرعىلىقتى مەكەنجايىندا 1,2 كەلىدەن استام سينتەتيكالىق ەسىرتكى، سونداي-اق تارازى، قاپتاما ماتەريالدارى مەن بۋىپ-تۇيۋگە ارنالعان قۇرالدار تاركىلەندى.
الماتى قالاسىندا جەدەل ءىس-شارالار بارىسىندا 44 جاستاعى ەر ادامنىڭ باسقارۋىنداعى اۆتوكولىك توقتاتىلىپ، جۇك سالعىشىنان ۇنتاق ءتارىزدى زات سالىنعان ءتورت پاكەت تابىلدى. ساراپتاما ناتيجەسىندە زاتتىڭ جالپى سالماعى 1,35 كەلى مەفەدرون ەكەنى انىقتالدى. كۇدىكتىنىڭ بۇل زاتتىڭ ءبىر بولىگىن دوستارىمەن بىرگە تۇتىنعانى، قالعانىن شامامەن 5 ملن تەڭگەگە ساتۋدى كوزدەگەنى بەلگىلى بولدى.
بارلىق كۇدىكتى ۇستالىپ، ۋاقىتشا ۇستاۋ يزولياتورىنا قامالدى. ەسىرتكى قىلمىستارىمەن كۇرەس جۇمىستارى جۇيەلى تۇردە جۇرگىزىلۋدە جانە ەلدىڭ بارلىق وڭىرلەرىن قامتي وتىرىپ، قوعامدىق ءتارتىپ پەن قاۋىپسىزدىكتى قامتاماسىز ەتۋگە باعىتتالعان، - دەدى ءىىم ەسىرتكى قىلمىسىنا قارسى ءىس-قيمىل كوميتەتى توراعاسىنىڭ ورىنباسارى قۋاندىق ءالجانوۆ.
