قازاقستان تۇركى الەمىندەگى ەڭ ءىرى كاسىبي شەبەرلىك چەمپيوناتىن وتكىزۋگە باستاماشىلىق ەتتى. بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا بەلگىلى بولدى.
5–9 قازان ارالىعىندا اقتاۋ قالاسىندا العاش رەت TurkicSkills حالىقارالىق كاسىبي شەبەرلىك چەمپيوناتى وتەدى. تۇركى الەمىنىڭ مادەني استاناسى سانالاتىن بۇل قالادا تۇركيا، ازەربايجان، وزبەكستان، قىرعىزستان، تۇرىكمەنستان جانە ماجارستاننان كەلگەن 16–22 جاس ارالىعىنداعى 70-كە جۋىق قاتىسۋشى مەن 90-عا تارتا بىلىكتى ساراپشى باس قوسادى.
جاستار قۇرىلىس، ينجەنەرلىك تەحنولوگيالار، اقپاراتتىق تەحنولوگيالار، الەۋمەتتىك قىزمەتتەر سەكىلدى 10 قۇزىرەت بويىنشا ءوزارا باق سىنايدى. اسىرەسە ءموبيلدى روبوتوتەحنيكا مەن ۇشقىشسىز ۇشۋ اپپاراتتارىن باسقارۋ سياقتى بولاشاعى زور باعىتتارعا ەرەكشە نازار اۋدارىلادى. ەڭ باستىسى جاس ماماندار ءوزارا تاجىريبە الماسىپ، كاسىبي شىڭدالادى.
«TurkicSkills چەمپيوناتى – جۇمىسشى ماماندىقتارىنىڭ بەدەلىن ارتتىرۋعا جانە تۇركى ەلدەرى اراسىنداعى كاسىبي ىنتىماقتاستىقتى نىعايتۋعا ارنالعان ماڭىزدى الاڭ. قازىرگى ۋاقىتتا ونى وتكىزۋگە قىزۋ دايىندىق جۇمىستارى جۇرۋدە. بۇل ءىس-شارا اياسىندا شامامەن 5000-عا جۋىق ادام قامتىلادى دەپ كۇتىلۋدە»، – دەيدى قر وقۋ-اعارتۋ مينيسترلىگىنىڭ «Talap» كەاق پرەزيدەنتى سانجار تاتيبەكوۆ.
چەمپيونات جاستاردىڭ الەۋەتىن اشۋعا، زاماناۋي تەحنولوگيالاردى دامىتۋعا جانە ەڭبەك نارىعىنىڭ سۇرانىسىنا ساي جاڭا بۋىن بىلىكتى كادرلارىن دايارلاۋعا جول اشادى.
شارانى قازاقستان رەسپۋبليكاسى وقۋ-اعارتۋ مينيسترلىگى ۇيىمداستىرادى. جوبانى جۇزەگە اسىرۋشىلار – قر وم جانىنداعى «Talap» كەاق جانە ماڭعىستاۋ وبلىسى اكىمدىگى.
