قازاقستان رەسپۋبليكاسى مادەنيەت جانە سپورت مينيسترلىگىنىڭ تۋريزم يندۋسترياسى كوميتەتىنىڭ توراعاسى نۇرتاس قاريپباەۆ ورتالىق كوممۋنيكاتسيالار قىزمەتىندەگى بريفينگتە الماتىدا وتەتىن «قايرات» – «رەال مادريد» ويىنىنا قاتىستى مالىمەت بەردى، دەپ حابارلايدى "ادىرنا" ۇلتتىق پورتالى.
ونىڭ ايتۋىنشا، ماتچقا بيلەتتەردىڭ بارلىعى ساتىلىپ كەتكەن.
«الماتىدا تۋريستەردى قابىلداۋعا بارلىق جاعداي جاسالعان. «قايرات» – «رەال مادريد» كەزدەسۋىنە 4 مىڭنان استام تۋريست كەلەدى دەپ بولجانىپ وتىر. بۇل قالا مەن ەل بيۋدجەتىنە شامامەن 2–3 ملرد تەڭگە ءتۇسىم اكەلەدى»، – دەدى نۇرتاس قاريپباەۆ.
سونىمەن قاتار ول الماتىنىڭ ينفراقۇرىلىمى تولىق دايىن ەكەنىن اتاپ ءوتتى. بۇعان دەيىن قالا دجەننيفەر لوپەس پەن Backstreet Boys سياقتى الەمدىك جۇلدىزداردىڭ كونتسەرتتەرىن قابىلداعان ەدى.
ەسكە سالا كەتەيىك، چەمپيوندار ليگاسىنىڭ جالپى كەزەڭىنىڭ ەكىنشى تۋرىنداعى «قايرات» – «رەال مادريد» ماتچى 30 قىركۇيەكتە الماتىدا وتەدى.
