استاناداعى جەڭىل رەلستى كولىك (LRT) جوباسىنا قاتىسقان بۇل كومپانيا تۇركىستان وڭىرىندە دە ءىرى ينۆەستيتسيالىق جوبالارعا قاتىسۋدى جوسپارلاپ وتىر. ونىڭ ىشىندە تۇركىستان قالاسىنىڭ شىعىس اينالما جولىنىڭ قۇرىلىسىن بيىلعى قىركۇيەك ايىندا باستالاتىن بولدى.
– ەكى مەملەكەتتىڭ پرەزيدەنتتەرىنىڭ تىعىز بايلانىسى، دوستىق قارىم-قاتىناسى ماڭىزدى باستامالارعا جول اشۋدا. ءبىر اي بۇرىن وزىڭىزبەن جولىققانىمىزدا تۇركىستان وڭىرىندە بىرقاتار جوبانى جۇزەگە اسىرۋعا كەلىسكەن بولاتىنبىز. ەندى سول جۇمىستار باستالادى. بۇل ستراتەگيالىق ارىپتەستىك تۇركىستان وبلىسىن دامىتۋعا سەرپىن بەرەدى دەپ سەنەمىن، – دەگەن نۇرالحان كوشەروۆ ءوڭىردىڭ ينۆەستيتسيالىق الەۋەتىن تاعى دا تانىستىردى.
الەۋەتتى ينۆەستور تۇركىستان قالاسىنىڭ شىعىس اينالما جولىن سالادى. بۇگىندە «باتىس ەۋروپا-باتىس قىتاي» اۆتوجولىنىڭ ءبىر بولىگى تۇركىستان قالاسىنىڭ ورتالىعىندا ورنالاسقان جانە شامامەن تاۋلىگىنە 8000 جۇك كولىگى ءجۇرىپ وتەدى. بۇل شاھاردا كولىك كەپتەلىسىن تۋىنداتىپ، جولداردىڭ ءجيى زاقىمدالۋىنا ىقپال ەتۋدە. وعان قوسا، ءىرى جۇك كولىكتەرى ءۇشىن قالانىڭ ءىشىن قاق جارىپ ءوتۋ دە قولايسىزدىق تۋدىرادى. وسى ماسەلەنى شەشۋ ءۇشىن تۇركىستاننىڭ شىعىس بولىگىنەن اينالما جول سالۋ جوسپارى جاسالىپ، قولداۋ تاۋىپ وتىر. 30 شاقىرىم جولدىڭ قۇرىلىسى 1,5 جىلدا اياقتالادى دەپ جوسپارلانعان.
قوس تاراپ وسى جولدىڭ قۇرىلىسىنا جانە وبلىستا لوگيستيكالىق ورتالىق پەن ءوندىرىس ورنىن اشۋ بويىنشا دا كەلىسسوز جۇرگىزىپ، جوبالار جۇزەگە اساتىن ايماققا شولۋ جاسادى. الداعى ۋاقىتتا وڭىردە جاڭا جۇمىس ورىندارىن اشۋ باعىتىنداعى جوبالار جالعاسىن تاپپاق.
ۇقساس جاڭالىقتار
