15 تامىزدان باستاپ تۇرعىن ءۇي سەكتورىندا ءورتتىڭ الدىن الۋعا جانە حالىقتىڭ ءبىلىم دەڭگەيىن ارتتىرۋعا باعىتتالعان ءورت قاۋىپسىزدىگى اكتسياسى وتكىزىلۋدە.
تجم اۋماقتىق بولىمشەلەرى الەۋمەتتىك جاعىنان وسال توپتارعا جاتاتىن 108 442 تۇرعىن ءۇيدى جانە 225 599 كوپبالالى وتباسىن ەسەپكە الدى. بۇگىنگى تاڭدا 112 969 ۇيدە پروفيلاكتيكالىق جۇمىس جۇرگىزىلىپ، ونىڭ بارىسىندا 289 387 ازاماتقا نۇسقاۋلىق بەرىلدى. ءۇي-جايلاردى ارالاۋ بارىسىندا 18 مىڭنان استام ءۇي ءورت قاۋىپسىزدىگى تالاپتارىنا ساي كەلتىرىلدى. بيىلعى جىلدىڭ 15 تامىزىنان 3 قازانىنا دەيىنگى ارالىقتا تۇرعىن ۇيلەرگە 9 536 داتچيك ورناتىلدى.
وڭىرلەردە تۇرعىن سەكتوردا ورتتەردىڭ الدىن الۋ ماقساتىندا كەشەندى پروفيلاكتيكالىق ءىس-شارالار جۇرگىزىلۋدە. بۇل ءىس-شارانىڭ نەگىزگى ماقساتى – جىلىتۋ ماۋسىمىندا توتەنشە جاعدايلاردىڭ الدىن الۋ جانە ءورت قاۋىپسىزدىگىن قامتاماسىز ەتۋ. رەيدتەر بارىسىندا تجد قىزمەتكەرلەرى پروفيلاكتيكالىق اڭگىمەلەر جۇرگىزىپ، نۇسقاۋلىقتار وتكىزىپ، جىلىتۋ جۇيەلەرىن، ەلەكتر قۇرالدارىن، گاز جابدىقتارىن قاۋىپسىز پايدالانۋ ەرەجەلەرىن جانە ءورت قاۋىپسىزدىگى تالاپتارىن تۇسىندىرەدى.
الماتى وبلىسى تجد جەرگىلىكتى اتقارۋشى ورگاندارمەن جانە ۆولونتەرلىك ۇيىمدارمەن بىرلەسىپ، تۇرعىن سەكتوردا پروفيلاكتيكالىق جۇمىستاردى كۇشەيتتى. الەۋمەتتىك وسال توپتارعا جاتاتىن ازاماتتار مەن كوپبالالى وتباسىلار تۇراتىن ۇيلەرگە ەرەكشە نازار اۋدارىلۋدا. بۇگىنگى تاڭدا 1000-نان استام ۇيگە ارالاۋ جۇرگىزىلدى. وڭىردە قوسىمشا قولداۋدى قاجەت ەتەتىن ازاماتتار تۇراتىن 3000-نان استام تۇرعىن ءۇي جانە 1000-نان استام كوپبالالى وتباسى ءۇيى ەسەپكە الىنعان. ازاماتتارعا 100-دەن استام ۋلى گاز داتچيگى ورناتىلدى. سونىمەن قاتار پەشپەن جىلىتۋ جۇيەلەرىن جوندەۋگە، ەلەكترمەن جابدىقتاۋ جۇيەلەرىن قالپىنا كەلتىرۋگە كومەك كورسەتىلىپ، مۇرجالار كۇيەدەن تازارتىلۋدا.
شىعىس قازاقستان وبلىسى تجد قىزمەتكەرلەرى پەشپەن جىلىتىلاتىن، الەۋمەتتىك وسال ساناتتاعى ازاماتتار تۇراتىن تۇرعىن ۇيلەردى ارالاپ، ءورت قاۋىپسىزدىگى ەرەجەلەرىنىڭ ساقتالۋىن كوزبەن شولىپ تەكسەرۋدە. 319 ۇيدە 379 ءورت قاۋىپسىزدىگى بۇزۋشىلىعى انىقتالىپ، سونىڭ 185-ءى مامانداردىڭ ۇسىنىمدارى ارقىلى سول جەردە جويىلدى. تەكسەرۋ بارىسىندا ۇيلەرگە ۋلى گاز داتچيكتەرى ورناتىلىپ، ۇيلەردى ورتكە قارسى قاۋىپسىز جاعدايعا كەلتىرۋگە كومەك كورسەتىلۋدە. جالپى وڭىردە سوڭعى جىلدارى شامامەن 16 000 داتچيك ورناتىلىپ، ولاردىڭ كومەگىمەن 42 ادامنىڭ ءومىرى قۇتقارىلدى.
باتىس قازاقستان وبلىسى تجد قىزمەتكەرلەرى «QAZAQGAZ AIMAQ» اق بقف ماماندارىمەن، پوليتسيا قىزمەتكەرلەرىمەن، گاز-تەحنيكالىق ينسپەكتسيا وكىلدەرىمەن جانە ۆولونتەرلەرمەن بىرلەسىپ پروفيلاكتيكالىق ءىس-شارالار وتكىزۋدە. تۇرعىن ۇيلەردى ارالاۋ بارىسىندا انىقتالعان ءورت قاۋىپسىزدىگى ەرەجەلەرىن بۇزۋ فاكتىلەرى بويىنشا ازاماتتارعا ءتيىستى ۇسىنىمدار بەرىلدى. قىزمەتكەرلەر 13 مىڭنان استام تۇرعىن ءۇيدى قامتىپ، 260-تان استام ۋلى گاز داتچيگىن ورناتتى.
تجم ازاماتتارعا جىلىتۋ ماۋسىمىندا ءورت قاۋىپسىزدىگى ەرەجەلەرىن قاتاڭ ساقتاۋ قاجەتتىگىن ەسكەرتەدى:
- تەك جارامدى پەشتەر مەن ەلەكتر قۇرالدارىن قولدانىڭىز;
- ەلەكتر جەلىلەرىن شامادان تىس جۇكتەمەڭىز;
- مۇرجالاردى ۋاقىتىندا كۇيەدەن تازارتىڭىز;
- جىلىتۋ جۇيەلەرىنىڭ جاعدايىن ۇنەمى تەكسەرىپ وتىرىڭىز;
- بالالاردى ەرەسەكتەردىڭ قاراۋىنسىز قالدىرماڭىز;
- تۇتاتقىش رەتىندە جانعىش سۇيىقتىقتاردى پايدالانباڭىز.
قاۋىپسىزدىك تالاپتارىن ساقتاۋ — ءوز ءومىرىڭىزدى جانە جاقىندارىڭىزدىڭ ءومىرىن ساقتاۋدىڭ كەپىلى.
