ءحىى ازاماتتىق فورۋم قارساڭىندا استانادا قازاقستان رەسپۋبليكاسىنىڭ مادەنيەت جانە اقپارات ءمينيسترى ايدا بالاەۆانىڭ ۇكىمەتتىك ەمەس ۇيىم (ۇەۇ) وكىلدەرىمەن كەزدەسۋى ءوتتى.
جيىن بارىسىندا ايدا بالاەۆا سوڭعى ۋاقىتتا ۇەۇ مەن سالالىق مينيسترلىكتەردىڭ باسشىلارى اراسىندا ونعا جۋىق كەزدەسۋ وتكەنىن اتاپ ءوتتى. بۇل بايلانىس ازاماتتىق قوعامدى تولعاندىراتىن بىرقاتار وزەكتى ماسەلەلەر بويىنشا ناقتى شەشىمدەر قابىلداۋعا مۇمكىندىك بەردى. ءمينيستردىڭ پىكىرىنشە، بۇگىنگى جيىن ازاماتتىق سەكتورمەن ارىپتەستىكتى ودان ءارى نىعايتۋعا باعىتتالعان ماڭىزدى قادام بولماق.
«ۇلتتىق قۇرىلتاي وتىرىسىندا مەملەكەت باسشىسى قوعامداعى وزەكتى ماسەلەلەردى شەشۋدە مەملەكەت پەن ۇكىمەتتىك ەمەس ۇيىمدار اراسىنداعى سەرىكتەستىكتى ارتتىرۋدىڭ ماڭىزىن اتاپ ءوتىپ، ۇەۇ تۋرالى زاڭنامانى جانە مەملەكەتتىك الەۋمەتتىك تاپسىرىستىڭ كريتەريلەرىن جەتىلدىرۋدى تاپسىردى. وسى ماقساتتا مينيسترلىك قۇرامىنا وڭىرلىك ساراپشىلار مەن ازاماتتىق سەكتور وكىلدەرىنەن تۇراتىن جۇمىس توپتارىن قۇردى»، – دەدى ايدا بالاەۆا.
ءمينيستردىڭ ايتۋىنشا، الداعى ءحىى ازاماتتىق فورۋم قوعامدىق ينستيتۋتتاردىڭ قىزمەتىن جاڭعىرتۋعا جانە ازاماتتىق قوعامنىڭ دامۋىنا جاڭا سەرپىن بەرمەك.
كەزدەسۋدە قاتىسۋشىلار بارلىق تىركەلگەن ۇەۇ مەن قايىرىمدىلىق ۇيىمدارى تۋرالى اشىق اقپاراتتى قامتيتىن بىرىڭعاي ەلەكتروندى پورتال (E-ۇەۇ) قۇرۋدى ۇسىندى. بۇل جۇيە ۇيىمداردىڭ قىزمەتى، مەملەكەتتىك الەۋمەتتىك تاپسىرىستار مەن جوبالاردى ىسكە اسىرۋ كەزەڭدەرى تۋرالى دەرەكتەردى اشىق فورماتتا ۇسىنۋعا مۇمكىندىك بەرەدى.
سونىمەن قاتار، ازاماتتىق جاۋاپكەرشىلىكتى ارتتىرۋ، ۆولونتەرلىكتى دامىتۋ جانە قوعامداعى كەلىسپەۋشىلىكتەردىڭ الدىن الۋ ءۇشىن مەدياتسيا تەتىكتەرىن ەنگىزۋ ماسەلەلەرى تالقىلاندى.
مينيسترلىك تاراپىنان مەملەكەت باسشىسىنىڭ تاپسىرمالارىن ىسكە اسىرۋ بويىنشا بەلسەندى جۇمىس جۇرگىزىلىپ جاتقانى اتاپ ءوتىلدى. اتاپ ايتقاندا، ۇكىمەتتىك ەمەس ۇيىمدار تۋرالى جاڭا زاڭ جوباسىن ازىرلەۋ ماقساتىندا وڭىرلىك ساراپشىلار مەن ۇەۇ وكىلدەرى قاتىساتىن جۇمىس توپتارى قۇرىلدى.
كەزدەسۋ قورىتىندىسى بويىنشا مەملەكەتتىك ورگاندار مەن ۇكىمەتتىك ەمەس سەكتور اراسىنداعى ىنتىماقتاستىقتى ودان ءارى نىعايتۋعا، سونداي-اق قوعامنىڭ دامۋىنا باعىتتالعان ازاماتتىق باستامالاردى قولداۋعا باعىتتالعان ناقتى ۇسىنىستار ازىرلەندى.
