قاسىم-جومارت توقاەۆ ۇلتتىق وليمپيادا كوميتەتىنىڭ پرەزيدەنتى گەننادي گولوۆكيندى قابىلدادى. بۇل تۋرالى اقوردا جاريالادى، دەپ حابارلايدى “ادىرنا” ۇلتتىق پورتالى.
كەزدەسۋدە مەملەكەت باسشىسى ۇلتتىق وليمپيادا كوميتەتىنىڭ الداعى جۇمىسىنىڭ باسىم باعىتتارىنا نازار اۋداردى. ول الدىمەن حالىقارالىق وليمپيادا كوميتەتى اياسىنداعى سەنىمدى جانە ءتيىمدى قارىم-قاتىناستى نىعايتۋ ماڭىزدى ەكەنىن اتاپ ءوتتى.
قاسىم-جومارت توقاەۆ ۇلتتىق قۇرامالارداعى سپورتشىلاردىڭ الداعى XXXII جازعى وليمپيادا ويىندارىنا دايارلىعىنا قاتىستى زور جاۋاپكەرشىلىك جۇكتەلەتىنىن ەسكە سالدى. سونىمەن قاتار ليتسەنزيالار سانىن كوبەيتۋدىڭ جانە پاريج وليمپياداسىندا ەلەۋلى ناتيجەگە قول جەتكىزۋ ءۇشىن ءتيىمدى جۇيە قۇرۋدىڭ ماڭىزدى مىندەت ەكەنىنە توقتالدى.
مەملەكەت باسشىسىنىڭ ايتۋىنشا، ءوز الەۋەتىن تانىتۋ ءۇشىن سپورتشىلارعا بارىنشا قولايلى جاعداي جاساپ، وتاندىق سپورتتىڭ وركەندەۋىنە كەرى اسەر ەتەتىن جاعىمسىز قۇبىلىستاردى جويۋ قاجەت. سونداي-اق ۇلتتىق قۇراماعا سپورتشىلاردى ىرىكتەۋ ءادىل جۇرگىزىلۋى كەرەك.
كەزدەسۋ سوڭىندا قاسىم-جومارت توقاەۆ گەننادي گولوۆكيننىڭ كاسىبيلىگى مەن مول تاجىريبەسى ەلىمىزدەگى وليمپيادالىق سپورت تۇرلەرىن دامىتۋدىڭ وزەكتى ماسەلەلەرىن ءتيىمدى شەشۋگە ىقپال ەتەتىنىنە سەنىم ءبىلدىردى.
