Qasym-Jomart Toqaev Ūlttyq olimpiada komitetınıŋ prezidentı Gennadii Golovkindı qabyldady. Būl turaly Aqorda jariialady, dep habarlaidy “Adyrna” ūlttyq portaly.
Kezdesude memleket basşysy Ūlttyq olimpiada komitetınıŋ aldaǧy jūmysynyŋ basym baǧyttaryna nazar audardy. Ol aldymen Halyqaralyq olimpiada komitetı aiasyndaǧy senımdı jäne tiımdı qarym-qatynasty nyǧaitu maŋyzdy ekenın atap öttı.
Qasym-Jomart Toqaev ūlttyq qūramalardaǧy sportşylardyŋ aldaǧy XXXII jazǧy Olimpiada oiyndaryna daiarlyǧyna qatysty zor jauapkerşılık jükteletının eske saldy. Sonymen qatar lisenziialar sanyn köbeitudıŋ jäne Parij Olimpiadasynda eleulı nätijege qol jetkızu üşın tiımdı jüie qūrudyŋ maŋyzdy mındet ekenıne toqtaldy.
Memleket basşysynyŋ aituynşa, öz äleuetın tanytu üşın sportşylarǧa barynşa qolaily jaǧdai jasap, otandyq sporttyŋ örkendeuıne kerı äser etetın jaǧymsyz qūbylystardy joiu qajet. Sondai-aq ūlttyq qūramaǧa sportşylardy ırıkteu ädıl jürgızıluı kerek.
Kezdesu soŋynda Qasym-Jomart Toqaev Gennadii Golovkinnıŋ käsıbilıgı men mol täjıribesı elımızdegı olimpiadalyq sport türlerın damytudyŋ özektı mäselelerın tiımdı şeşuge yqpal etetınıne senım bıldırdı.
Ūqsas jaŋalyqtar
