Atyraýda ótip jatqan Ulttyq quryltaıda prezıdent Qasym-Jomart Toqaev eltańba ózgeretinin jarııalady, dep habarlaıdy «Adyrna» tilshisi Aqordaǵa silteme jasap.
Memleket basshysy memlekettik rámizderde ulttyq biregeıligimizdiń aıqyn kórinis tapqanyn málimdedi.
«Men byltyr aımaqtardyń nyshanyn, ıaǵnı sımvolıkasyn júıelep, biryńǵaı standartqa keltirý qajettigin aıttym. Nyshandardan sol óńirdiń ereksheligimen qatar, elimizdiń bolmys-bitimi de baıqalýǵa tıis. Qazir osy baǵytta naqty jumys jasalyp jatyr. Buǵan mamandar, sarapshylar jáne belsendi azamattar atsalysýda. Sonymen qatar olar Memlekettik nyshandarymyzdy túgel jańǵyrtý týraly pikir aıtyp jatqanyn bilemin.
Bizdiń Kók týymyzda min joq. Onda elimizdiń biregeı bolmysy naqty beınelengen. Ánuranymyz da naǵyz ulttyq rýhty pash etedi. Qazaqtyń ánurany álemniń ár túkpirinde shyrqalyp júr. Jańa jyldy jaqyndarymyzdyń ortasynda ánuranmen qarsy alý jaqsy dástúrge aınaldy. Bir sózben aıtsaq, ánuranymyzdyń sózi de, áýeni de halyqtyń júregine ábden ornyqqan»,—dedi ol.
Prezıdenttiń aıtýynsha, kópshilik qazirgi eltańbany Keńes zamanyndaǵy gerbke uqsatyp júr.
«Al eltańbamyzǵa qatysty synı pikirler aıtylyp qalady. Ony Keńes zamanyndaǵy gerbke uqsatyp jatady. Tym eklektıkalyq, kúrdeli deıdi. Mundaı oıdy el isine beı-jaı qaramaıtyn belsendi azamattar ǵana emes, mamandar da aıtyp júr. Oryndy paıymdar eskerýsiz qalmaýy kerek.
Ortaq kelisimge kelgen jaǵdaıda arnaýly komıssııa qurýǵa bolady. Bul komıssııa máseleni jan-jaqty qarastyryp, qoǵamdyq talqylaý ótkizedi. Sosyn Qazaqstannyń jańa eltańbasynyń jobasyn jasaýǵa ashyq baıqaý jarııalanady»,—dep tolyqtyrdy Toqaev.
Qazaqstannyń qazirgi rámizderi 1992 jyly jazda qabyldanǵan bolatyn.
