ۇلىتاۋ وبلىسىنىڭ تسيفرلىق تەحنولوگيالار باسقارماسى ءوڭىر باسشىسى داستان رىسپەكوۆكە وبلىستاعى تەحنيكالىق رەسۋرستاردى ورتالىقتاندىرۋعا ارنالعان جاڭا جوبانى تانىستىردى.
جوبانىڭ باستى ماقساتى – تسيفرلىق ينفراقۇرىلىمدى ورتالىقتاندىرۋ ارقىلى باسقارۋ جۇيەسىن جەتىلدىرۋ جانە ءوڭىردىڭ تسيفرلىق ترانسفورماتسياسىن ىلگەرىلەتۋ.
ۇسىنىلعان باستاما اياسىندا وبلىس اۋماعىنداعى ءارتۇرلى مەكەمەلەر مەن ۇيىمدارعا تيەسىلى بەينەباقىلاۋ كامەرالارى، ينتەرنەت ارنالارى جانە باسقا دا تسيفرلىق ينفراقۇرىلىم ەلەمەنتتەرى بىرىڭعاي باسقارۋ ورتالىعىنا بىرىكتىرىلمەك. بۇل ءوز كەزەگىندە تەحنيكالىق رەسۋرستاردى ءتيىمدى پايدالانىپ، قاۋىپسىزدىك دەڭگەيىن ارتتىرۋعا جانە باقىلاۋ ساپاسىن جاقسارتۋعا مۇمكىندىك بەرەدى.
جوبانى ىسكە اسىرۋ ناتيجەسىندە تەحنيكالىق شىعىندار قىسقارىپ، دەرەكتەردىڭ ساقتالۋى مەن اقپاراتتىق قاۋىپسىزدىك قامتاماسىز ەتىلەدى. سونىمەن قاتار، ءتۇرلى سالاداعى تسيفرلىق پروتسەستەردى اۆتوماتتاندىرۋ وبلىستاعى مەملەكەتتىك قىزمەت كورسەتۋدىڭ تيىمدىلىگىن ارتتىرىپ، تۇرعىندارعا ساپالى ءارى جەدەل قىزمەت ۇسىنۋعا جول اشادى.
كەزدەسۋ بارىسىندا وبلىس اكىمى داستان رىسپەكوۆ جوبانىڭ ستراتەگيالىق ماڭىزدىلىعىنا توقتالىپ، ونى كەزەڭ-كەزەڭىمەن جۇزەگە اسىرۋ بويىنشا ناقتى ۇسىنىستار ازىرلەۋدى تاپسىردى. سونداي-اق، ايماقتىڭ تسيفرلىق الەۋەتىن ارتتىرۋ ماقساتىندا يننوۆاتسيالىق شەشىمدەردى كەڭىنەن ەنگىزۋدىڭ ماڭىزىن اتاپ ءوتتى.
“تسيفرلىق ينفراقۇرىلىمدى جۇيەلەۋ – بۇل تەك تەحنولوگيالىق جاڭعىرۋ ەمەس، باسقارۋ ساپاسىن ارتتىرۋدىڭ، ءتيىمدى شەشىم قابىلداۋدىڭ جانە حالىققا ىڭعايلى قىزمەت كورسەتۋدىڭ كەپىلى”، – دەدى ءوڭىر باسشىسى.
