پاۆلودار وبلىسىندا 11 قازان كۇنى قار جاۋىپ، اۋا تەمپەراتۋراسى نولدەن تومەندەدى، دەپ حابارلايدى "ادىرنا" ۇلتتىق پورتالى.
قار جاۋى تۇندە باستالعان. قالا تۇرعىندارى الەۋمەتتىك جەلىدە قازان ايىنداعى قالىڭ قاردىڭ ۆيدەولارىن ءبولىسىپ جاتىر. كوپشىلىگى بۇل مەزگىلگە ءتان ەمەس اۋا رايىنا تاڭدانىسىن جاسىرمادى.
پوليتسيا دەپارتامەنتى جۇرگىزۋشىلەرگە اۋا رايىنىڭ ناشارلاۋىنا بايلانىستى ساق بولۋدى ەسكەرتتى.
«قار مەن جاۋىن-شاشىننىڭ ارالاس ءتۇسۋى جانە كوكتايعاقتىڭ پايدا بولۋى سالدارىنان وبلىس جولدارىندا قوزعالىس شەكتەلۋى مۇمكىن. سوندىقتان اۋا رايى بولجامىن باقىلاپ، جول جابىلعان جاعدايدا جولعا شىقپاڭىزدار. ال اۋىلدىق جەرلەردىڭ تۇرعىندارىنا قولايسىز اۋا رايىندا الىسقا جاياۋ بارماۋعا كەڭەس بەرەمىز»، – دەلىنگەن دەپارتامەنت حابارلاماسىندا.
سونىمەن قاتار، پوليتسيا جۇرگىزۋشىلەرگە اراقاشىقتىق ساقتاۋدى، جىلدامدىقتى اسىرماۋدى جانە الىس ساپارلارعا شىقپاۋدى ۇسىندى.
پاۆلودار قالالىق اكىمدىگى قار تازالاۋ جۇمىستارىنا 300-گە جۋىق ارنايى تەحنيكانى شىعارعانىن حابارلادى. الايدا تۇرعىنداردىڭ ايتۋىنشا، قار تازالاۋ قارقىنى باياۋ ءجۇرىپ جاتىر.
سينوپتيكتەردىڭ بولجامىنشا، الداعى كۇندەرى پاۆلودار وبلىسىندا ايازدى جانە قارلى اۋا رايى ساقتالىپ، تۇنگى ۋاقىتتا –9°C-قا دەيىن سۋىق بولادى.
