مەملەكەت باسشىسىنىڭ وكىمىمەن ەرجان اشىقباەۆ قازاقستان رەسپۋبليكاسىنىڭ سىرتقى ىستەر ءمينيسترىنىڭ ءبىرىنشى ورىنباسارى لاۋازىمىنا تاعايىندالدى، دەپ حابارلايدى "ادىرنا" ۇلتتىق پورتالى.
ەرجان اشىقباەۆ 1974 جىلعى 16 ماۋسىمدا الماتى قالاسىندا دۇنيەگە كەلگەن. ول 1998 جىلى ءال-فارابي اتىنداعى قازاق ۇلتتىق ۋنيۆەرسيتەتىن، 2012 جىلى گارۆارد ۋنيۆەرسيتەتىنىڭ دج.كەننەدي اتىنداعى مەملەكەتتىك باسقارۋ مەكتەبىن تامامداعان. ماماندىعى — حالىقارالىق قاتىناستار جانە مەملەكەتتىك باسقارۋ ماگيسترى.
ديپلوماتيالىق قىزمەتىن 1998 جىلى سىرتقى ىستەر مينيسترلىگىنىڭ ءتورتىنشى دەپارتامەنتىندە رەفەرەنت بولىپ باستاعان. كەيىن مينيسترلىكتىڭ ورتالىق اپپاراتىندا ءتۇرلى قىزمەتتەر اتقارىپ، قازاقستاننىڭ بەلگياداعى ەلشىلىگىندە ءىسساپاردا بولدى.
2007–2011 جىلدارى سىرتقى ىستەر مينيسترلىگىنىڭ حالىقارالىق اقپارات كوميتەتىنىڭ توراعاسى جانە ەرەكشە تاپسىرمالار جونىندەگى ەلشى بولدى. 2012 جىلى ۇكىمەتتىڭ رەسمي وكىلى ءارى پرەمەر-مينيستر كەڭسەسى باسشىسىنىڭ ورىنباسارى قىزمەتىن اتقاردى.
سونداي-اق، 2012–2013 جىلدارى پرەزيدەنت اكىمشىلىگىنىڭ سىرتقى ساياسات ورتالىعىن باسقاردى. 2013–2021 جىلدارى سىرتقى ىستەر ءمينيسترىنىڭ ورىنباسارى بولدى. 2021 جىلدان بەرى قازاقستاننىڭ اقش-تاعى توتەنشە جانە وكىلەتتى ەلشىسى قىزمەتىن اتقارعان.
ول اعىلشىن، تۇرىك جانە فرانتسۋز تىلدەرىن ەركىن مەڭگەرگەن.
