تۇركىستان قالاسىندا الداعى جىلىتۋ ماۋسىمىنا دايىندىق جوسپارعا ساي جۇرگىزىلۋدە. قالانىڭ بارلىق جىلۋ قازاندىقتارى مەن جەلىلەرى تەكسەرىلىپ، جوندەۋدەن ءوتىپ جاتىر. قازىرگى تاڭدا 18 جىلۋ قازاندىعى مەن 55 شاقىرىمنان استام جىلۋ جەلىلەرى قىسىمداۋ، شايۋ جۇمىستارىنان ءوتتى جانە قاجەتتى وتىنمەن قامتىلۋدا. سونىمەن قاتار جاڭا تەحنولوگيالاردى پايدالانۋ ارقىلى وسى سالانى دامىتۋ ماڭىزدى. جىلۋ جەلىلەرىنىڭ توزۋ دەڭگەيى جوعارى ينفراقۇرىلىمدى جاڭارتۋ جانە كوممۋنالدىق شارۋاشىلىقتى جاڭعىرتۋعا بەلگىلەنگەن ەرەجەلەر شەگىندە
ينۆەستيتسيالاردى تارتۋ ماسەلەلەرى قاراستىرىلۋدا.
تۇركىستان وبلىسىنىڭ اكىمى نۇرالحان كوشەروۆ وبلىس ورتالىعىنىڭ جىلىتۋ ماۋسىمىنا دايىندىق بارىسىن پىسىقتادى. اكىم جاۋاپتى باسشىلارعا بارلىق جۇمىستاردى بەلگىلەنگەن مەرزىمدە تولىق اياقتاۋدى تاپسىردى.
– الداعى جىلىتۋ ماۋسىمىنا دايىندىق – بۇل ەڭ الدىمەن تۇرعىنداردىڭ قاۋىپسىزدىگى مەن جايلى ءومىر ءسۇرۋىنىڭ كەپىلى. ءبىز ءاربىر الەۋمەتتىك نىسان مەن كوپقاباتتى ءۇيدىڭ جىلۋعا ۋاقىتىلى قوسىلۋىن قامتاماسىز ەتۋىمىز كەرەك. جۇمىستار بەكىتىلگەن جوسپارعا سايكەس جۇرگىزىلۋى ءتيىس، – دەدى تۇركىستان وبلىسىنىڭ اكىمى نۇرالحان كوشەروۆ.
قالادا 219 كوپقاباتتى تۇرعىن ءۇي، 65 الەۋمەتتىك نىسان، 60 كاسىپكەرلىك وبەكتىسى مەن 33 جەكە تۇرعىن ءۇي جىلۋ جۇيەسىنە قوسىلۋعا دايىن. وبلىس ورتالىعىنداعى 18 نەگىزگى قازاندىق تابيعي گازبەن جۇمىس ىستەيدى. ەنەرگەتيكالىق قاۋىپسىزدىكتى قامتاماسىز ەتۋ ءۇشىن قاجەتتى قۋات پەن وتىن كولەمى ەسەپتەلىپ، جەتكىزۋ جۇمىستارى جۇرگىزىلۋدە.
قازىرگى تاڭدا قالادا جىلىتۋ ماۋسىمىن 20 قازانعا دەيىن تولىق باستاۋ جوسپارلانىپ وتىر. ينفراقۇرىلىم مەن وتىن جەتكىزۋ بويىنشا ماسەلەلەر اكىمدىك باقىلاۋىندا. تۇركىستان قالاسىندا قىسقى قاۋىپسىزدىك پەن تۇراقتى جىلۋ بەرۋ تولىق قامتاماسىز ەتىلەدى.
ۇقساس جاڭالىقتار
