قازاقستان ۇكىمەتى سولتۇستىك شەكاراداعى حالىقارالىق اۆتوتاسىمالدارعا بايلانىستى تۋىنداعان ماسەلەلەرگە قاتىستى رەسەيگە نوتا جىبەردى، دەپ حابارلايدى "ادىرنا" ۇلتتىق پورتالى.
رەسەيدە ەنگىزىلگەن جاڭا ەرەجەگە سايكەس، ۆيزاسىز رەجيممەن كىرەتىن شەتەل ازاماتتارىنا ەل اۋماعىندا ءبىر جىل ىشىندە 90 كۇننەن ارتىق بولۋعا تىيىم سالىنعان. بۇل شەكتەۋ قازاقستاندىق جۇك كولىگى جۇرگىزۋشىلەرىنە ايىپپۇل مەن دەپورتاتسيا قاۋپىن تۋدىرعان.
وسى جاعدايعا بايلانىستى قازاقستان تاراپى رەسەيگە رەسمي ەسكەرتۋ نوتاسىن جولداپ، ماسەلەنى تالقىلاۋ ءۇشىن كەلىسسوزدەر وتكىزدى. كەلىسسوزدەرگە قازاقستان ۇكىمەتى مەن «اتامەكەن» ۇلتتىق كاسىپكەرلەر پالاتاسى دا قاتىسقان.
مەملەكەتتىك ورگاننىڭ حابارلاۋىنشا، ءتيىستى شەشىم قابىلدانعانعا دەيىن تاسىمالداۋشىلارعا ءوز جۇرگىزۋشىلەرىنىڭ رەسەي اۋماعىندا بولۋ مەرزىمدەرىن الدىن الا تەكسەرىپ، زاڭبۇزۋشىلىقتاردىڭ الدىن الۋعا كەڭەس بەرىلەدى.
دەگەنمەن، بۇعان دەيىن 31 قازاقستاندىق جۇرگىزۋشىگە قاتىستى اكىمشىلىك ءىس قوزعالىپ، ايىپپۇل سالۋ جانە دەپورتاتسيا تۋرالى قاۋلى شىعارىلعان.
ساۋدا جانە ينتەگراتسيا مينيسترلىگىنىڭ مالىمەتىنشە، قازىر ەكى ەل اراسىندا ۇستالعان نەمەسە جاۋاپكەرشىلىككە تارتىلعان جۇرگىزۋشىلەر بويىنشا اقپارات الماسۋ ءجۇرىپ جاتىر.
سونىمەن قاتار، رەسەي تاراپى قازاقستاندىق جۇرگىزۋشىلەرگە قاتىستى شەكتەۋلەردى قايتا قاراۋ مۇمكىندىگىن زەرتتەپ جاتقانىن حابارلادى. بۇعان دەيىنگى تالداۋ ناتيجەسى رەسەيلىك نورمالاردىڭ كەيبىر تارماقتارى ەكىجاقتى جانە حالىقارالىق كەلىسىمدەرگە سايكەس كەلمەيتىنىن كورسەتكەن.
