Qazaqstan Ükımetı soltüstık şekaradaǧy halyqaralyq avtotasymaldarǧa bailanysty tuyndaǧan mäselelerge qatysty Reseige nota jıberdı, dep habarlaidy "Adyrna" ūlttyq portaly.
Reseide engızılgen jaŋa erejege säikes, vizasyz rejimmen kıretın şetel azamattaryna el aumaǧynda bır jyl ışınde 90 künnen artyq boluǧa tyiym salynǧan. Būl şekteu qazaqstandyq jük kölıgı jürgızuşılerıne aiyppūl men deportasiia qaupın tudyrǧan.
Osy jaǧdaiǧa bailanysty Qazaqstan tarapy Reseige resmi eskertu notasyn joldap, mäselenı talqylau üşın kelıssözder ötkızdı. Kelıssözderge Qazaqstan Ükımetı men «Atameken» ūlttyq käsıpkerler palatasy da qatysqan.
Memlekettık organnyŋ habarlauynşa, tiıstı şeşım qabyldanǧanǧa deiın tasymaldauşylarǧa öz jürgızuşılerınıŋ Resei aumaǧynda bolu merzımderın aldyn ala tekserıp, zaŋbūzuşylyqtardyŋ aldyn aluǧa keŋes berıledı.
Degenmen, būǧan deiın 31 qazaqstandyq jürgızuşıge qatysty äkımşılık ıs qozǧalyp, aiyppūl salu jäne deportasiia turaly qauly şyǧarylǧan.
Sauda jäne integrasiia ministrlıgınıŋ mälımetınşe, qazır ekı el arasynda ūstalǧan nemese jauapkerşılıkke tartylǧan jürgızuşıler boiynşa aqparat almasu jürıp jatyr.
Sonymen qatar, Resei tarapy qazaqstandyq jürgızuşılerge qatysty şekteulerdı qaita qarau mümkındıgın zerttep jatqanyn habarlady. Būǧan deiıngı taldau nätijesı reseilık normalardyŋ keibır tarmaqtary ekıjaqty jäne halyqaralyq kelısımderge säikes kelmeitının körsetken.
