قاراعاندىدا قوعام نازارىن اۋدارعان اليكا مۇحاماديەۆا ءىسى بويىنشا سوت وتىرىسى جالعاسۋدا. بۇگىن مەملەكەتتىك ايىپتاۋشى ايىپتالۋشىعا 4,5 جىل باس بوستاندىعىنان ايىرۋ جازاسىن تاعايىنداۋدى سۇرادى، دەپ حابارلايدى «ادىرنا» ۇلتتىق پورتالى Ulysmedia.kz سايتىنا سىلتەپ.
پروكۋروردىڭ ايتۋىنشا، مۇحاماديەۆا ءوز كىناسىن مويىنداعانىمەن، ءىس قوعامدا كەڭ رەزونانس تۋدىرعان. سوندىقتان جازانى ناقتى باس بوستاندىعىنان ايىرۋ تۇرىندە بەلگىلەۋ قاجەت دەپ ەسەپتەيدى.
ايىپتالۋشى سوت بارىسىندا تاعى دا جۇرتشىلىقتان كەشىرىم سۇراپ، جاساعان ىسىنە وكىنەتىنىن ءبىلدىردى. تىڭدالىم اشىق فورماتتا ءوتىپ جاتىر، قوعامنىڭ نازارى – سوتتىڭ الداعى شەشىمىندە.
ەسكە سالايىق، جاز ايلارىندا مۇحاماديەۆانىڭ Threads الەۋمەتتىك جەلىسىندەگى جازبالارى قوعامدا ۇلكەن داۋ تۋدىرعان ەدى. پايدالانۋشىلاردىڭ شاعىمدارىنان كەيىن پوليتسيا تەكسەرىس باستاپ، 2025 جىلدىڭ شىلدەسىندە مۇحاماديەۆا قاماۋعا الىنعان.
العاشقىدا ول كىناسىن جارتىلاي مويىنداپ، جازبالارى كونتەكستەن ءۇزىپ الىنعانىن ايتقان. كەيىن كوپشىلىك الدىندا كەشىرىم سۇراپ، ەشكىمنىڭ نامىسىنا تيۋ نيەتى بولماعانىن مالىمدەگەن.
قازان ايىندا ءىس سوتقا جولدانىپ، تىڭدالىم باستالعان بولاتىن.
