اقش-تا پرەزيدەنت دونالد ترامپتىڭ ساياساتىنا قارسى باعىتتالعان كەڭ اۋقىمدى نارازىلىق اكتسيالارى ءوتتى. "No Kings" ("پاتشالارعا جول جوق") دەپ اتالاتىن قوزعالىس اياسىندا وتكەن بۇل بەيبىت شەرۋلەرگە شامامەن 7 ميلليون ادام قاتىسقان، دەپ حابارلايدى “ادىرنا”.
ۇيىمداستىرۋشىلاردىڭ ايتۋىنشا، نارازىلىقتار اقش تاريحىنداعى ەڭ ءىرى بىركۇندىك شەرۋلەردىڭ ءبىرى بولعان. اكتسيالار ەلدىڭ 2 700-دەن استام قالاسىندا ءوتتى جانە ەشقانداي ءتارتىپ بۇزۋشىلىقسىز، بەيبىت تۇردە ۇيىمداستىرىلعان.
ماسەلەن، چيكاگو قالاسىندا وتكەن شەرۋ Indivisible Chicago Alliance ۇيىمىنىڭ باستاماسىمەن ۇيىمداستىرىلىپ، وعان 250 مىڭعا جۋىق ادام قاتىسقان. قاتىسۋشىلار اۆتوريتارلىق باسقارۋ ستيلىنە قارسىلىق ءبىلدىرىپ، اقش — "پاتشالارعا" ەمەس، حالىققا تيەسىلى ەل ەكەنىن العا تارتتى.
No Kings قوزعالىسى سەنبى كۇنى اقش-تىڭ بارلىق شتاتتارىندا جانە ۆاشينگتوندا ءوز ءۇنىن جەتكىزدى. ال العاشقى شەرۋلەر 14 ماۋسىمدا — اسكەري پاراد پەن دونالد ترامپتىڭ 79 جىلدىق تۋعان كۇنىنە وراي وتكەن بولاتىن.
ەسكە سالساق، شەرۋلەر قارساڭىندا ترامپ Fox News تەلەارناسىنا بەرگەن سۇحباتىندا الداعى نارازىلىقتارعا قاتىستى پىكىر ءبىلدىرىپ، ءوزىن "پاتشا رەتىندە سانامايتىنىن" ايتقان ەدى.
