فرانتسيانىڭ بۇرىنعى پرەزيدەنتى نيكوليا ساركوزي سايلاۋ ناۋقانى كەزىندە زاڭسىز قارجىلاندىرۋ ءىسى بويىنشا سوت ۇكىمىنە سايكەس پاريجدەگى لا-سانتە تۇرمەسىنە جەتكىزىلدى، دەپ حابارلايدى "ادىرنا" ۇلتتىق پورتالى.
سوت 2007 جىلعى پرەزيدەنتتىك سايلاۋ كەزىندە ساركوزي ليۆيا بيلىگىنەن زاڭسىز قارجىلاي كومەك العانىن انىقتاعان. ەكس-پرەزيدەنت 5 جىلعا باس بوستاندىعىنان ايىرىلدى، 100 مىڭ ەۋرو ايىپپۇل تولەيدى جانە 5 جىل بويى مەملەكەتتىك قىزمەتتە جۇمىس ىستەۋ قۇقىعىنان ايىرىلدى.
70 جاستاعى ساياساتكەر ۇكىممەن كەلىسپەيتىنىن ايتىپ، ونى «قاتەلىك ءارى فرانتسيا ءۇشىن قورلاۋ» دەپ اتادى.
ەكس-پرەزيدەنتتى تۇرمەگە ايەلى، ايگىلى مودەل جانە ءانشى كارلا برۋني مەن ادۆوكاتى شىعارىپ سالدى. ونىڭ ءۇيىنىڭ الدىندا جينالعان تۇرعىندار «نيكوليا، تەزىرەك ورال!» دەگەن جازۋى بار فرانتسۋز جالاۋلارىن ۇستاپ، قولداۋ ءبىلدىردى.
ساركوزي تۇرمەگە بارار الدىندا الەۋمەتتىك جەلىدە مالىمدەمە جاريالادى.
«بۇگىن تۇرمەگە بۇرىنعى پرەزيدەنتتى ەمەس، جازىقسىز ادامدى وتىرعىزادى»، — دەپ جازدى ول.
فرانتسيانىڭ قازىرگى پرەزيدەنتى ەممانۋەل ماكرون ساركوزيمەن جۇما كۇنى ەليسەي سارايىندا كەزدەسكەنىن راستادى.
«بۇل – ادامگەرشىلىك تۇرعىسىنان تابيعي ارەكەت. مەن ءوزىمنىڭ بۇرىنعى ارىپتەسىمدى قابىلدادىم»، — دەدى ماكرون BFMTV تەلەارناسىنا بەرگەن سۇحباتىندا.
ايتا كەتسەك، نيكوليا ساركوزي 2007–2012 جىلدارى فرانتسيا پرەزيدەنتى بولعان. ول ميگراتسيا ماسەلەلەرىندە قاتاڭ ۇستانىمىمەن تانىلعان.
فرانتسيانىڭ ەكس-پرەزيدەنتى ول 2007 جىلعى سايلاۋ ناۋقانىن ليۆيا رەجيمىنەن زاڭسىز قارجىلاندىرۋ ءىسى بويىنشا قىلمىستىق ءسوز بايلاسۋعا كىنالى دەپ تانىلعانى تۋرالى حابارلاعان ەدىك.
