فوتو: Musees de Langres
فرانتسيانىڭ تاعى ءبىر مۇراجايىنان شامامەن 104 مىڭ اقش دوللارىنا تەڭ التىن جانە كۇمىس تيىندار، ياعني بارلىعى 2000-عا جۋىق جادىگەر ۇرلاندى. وقيعا پاريجدەگى لۋۆر مۇراجايىنان كورولدىك اشەكەيلەر ۇرلانعاننان بىرنەشە ساعات وتكەن سوڭ بولعان. بۇل تۋرالى ۆۆس جازدى، دەپ حابارلايدى "ادىرنا".
اقپاراتقا سايكەس، ۇرلىق فرانتسيانىڭ سولتۇستىك-شىعىسىندا ورنالاسقان لاندر قالاسىنداعى فيلوسوف دەني ديدروعا ارنالعان Maison des Lumières مۇراجايىندا ورىن العان.
سەيسەنبى كۇنى جۇمىسقا ورالعان قىزمەتكەرلەر سىنعان اينەكتەردى كورىپ، دەرەۋ دابىل قاققان. رەسمي تۇلعالاردىڭ ايتۋىنشا، تيىندار كاسىبي تۇردە، “جوعارى دەڭگەيدەگى بىلىكتىلىكپەن” تاڭدالىپ الىنعان.
سوڭعى ۋاقىتتا فرانتسياداعى مادەني نىسانداردا ۇرلىق جيىلەپ كەتتى. 19 قازان تاڭعى ۋاقىتتا بەلگىسىز ءبىر توپ ۇرى لۋۆرعا نەبارى ءتورت مينۋتقا كىرىپ، باعا جەتپەس زەرگەرلىك بۇيىمداردى قولدى قىلعان بولاتىن. وقيعا مۋزەيدىڭ ەڭ ادەمى جانە ەڭ كونە زالدارىنىڭ ءبىرى – اپوللون گالەرەياسىندا بولعان.
وتكەن ايدا دا بەلگىسىز ادامدار پاريجدەگى تابيعات تاريحى مۇراجايىنا كىرىپ، جالپى قۇنى شامامەن 1,5 ميلليون ەۋرو تۇراتىن 6 التىن قۇيمالاردى ۇرلاپ كەتكەن. فرانتسۋز باق-ىنىڭ حابارلاۋىنشا، سول كەزدە مۇراجايدىڭ دابىل جانە بەينەباقىلاۋ جۇيەلەرى كيبەرشابۋىل سالدارىنان ىستەن شىققان، ال ۇرىلار مۇنى الدىن الا بىلگەن بولۋى مۇمكىن.
