قازاقستاندا ماگيستراتۋراعا كەشەندى تەستىلەۋگە قاتىسۋعا ءوتىنىم قابىلداۋ جانە دوكتورانتۋراعا وقۋعا قاجەتتى قۇجاتتاردى تاپسىرۋ 28 قازاننان باستالادى، دەپ حابارلايدى ادىرنا”.
وتىنىمدەر app.testcenter.kz پورتالىندا ونلاين قابىلدانادى. قۇجات قابىلداۋ 10 قاراشاعا دەيىن جالعاسادى. تالاپكەرلەر تىركەلۋ بارىسىندا تەست تاپسىراتىن قالانى، ءتىلدى جانە ءبىلىم بەرۋ باعدارلاماسى توبىن وزدەرى تاڭدايدى. بۇل وزگەرىستەردى قۇجات قابىلداۋ اياقتالعانعا دەيىن عانا تۇزەتۋگە مۇمكىندىك بەرىلەدى.
مينيسترلىكتىڭ حابارلاۋىنشا، ماگيستراتۋراعا تۇسۋگە ارنالعان كەشەندى تەستىلەۋ قاراشا–جەلتوقسان ايلارىندا ەلەكتروندى فورماتتا وتەدى. تالاپكەرلەر شەت ءتىلى بويىنشا تەست، وقۋ-عىلىمي دايىندىقتى انىقتاۋ تەستى جانە بەيىندىك ءپان بويىنشا تاپسىرما ورىندايدى. تەستىلەۋگە 3 ساعات 55 مينۋت ۋاقىت بەرىلەدى. ءبىلىم بەرۋ باعدارلامالارى توبىنا سايكەس بەلگىلەنگەن ءوتۋ بالى — 75 بالل.
ءپروفيلدى ماگيستراتۋراعا تاپسىرۋشىلار تەك بەيىندىك ءپان تەستىن تاپسىرادى. ءوتۋ بالى – 30 بالل.
ال دوكتورانتۋراعا تۇسۋشىلەر الدىمەن جوعارى وقۋ ورىندارىنىڭ قابىلداۋ كوميسسياسىنا قۇجات تاپسىرىپ، سودان كەيىن عانا ۇلتتىق تەستىلەۋ ورتالىعىنا تىركەلەدى. ولارعا قازتەست سەرتيفيكاتىن جانە شەت ءتىلىن مەڭگەرگەنىن راستايتىن قۇجات ۇسىنۋ مىندەتتەلەدى. TOEFL ITP سەرتيفيكاتى بار تالاپكەرلەر اعىلشىن تىلىنەن قوسىمشا تەست تاپسىرادى.
دوكتورانتۋرا بويىنشا كىرىس ەمتيحاندارى جەلتوقسان ايىندا وتەدى. فيلوسوفيا دوكتورى (PhD) باعدارلاماسىنا قابىلداۋ ءۇشىن تالاپكەر كەمىندە 75 بالل جيناۋى ءتيىس. ال بەيىندىك جانە يندۋستريالىق PhD باعدارلامالارى بويىنشا ءوتۋ بالى — 50.
تەستىلەۋ مەن ەمتيحاننىڭ وتەتىن ورنى مەن ۋاقىتى تۋرالى اقپارات تالاپكەرلەردىڭ جەكە كابينەتتەرىنە 14 قاراشادا جاريالانادى.
