Bek Air اۋە كومپانياسىنىڭ قۇلاۋىنا قاتىستى تەرگەۋ بارىسىندا اپاتتىڭ ناقتى سەبەبى جي كومەگىمەن انىقتالماق، دەپ حابارلايدى "ادىرنا" ۇلتتىق پورتالى.
ادۆوكات سەرگەي دەرجاۆەتستىڭ ايتۋىنشا، العاشقى سوت-مەديتسينالىق ساراپتاما اسىعىس جۇرگىزىلگەن جانە تەرگەۋدىڭ باستاپقى كەزەڭىندە تەرگەۋشىلەر وقيعانىڭ بارلىق ءمان-جايىن بىلمەگەن.
«ساراپشىلار تولىق جاۋاپ بەرە المادى، سەبەبى ولاردىڭ وزدەرى اپاتتىڭ قالاي بولعانىن انىق تۇسىنبەدى. سوندىقتان ولاردىڭ قورىتىندىسى تولىق ەمەس. مەن سوتتان ۇشاقتىڭ ساعاتىنا 100 جانە 200 شاقىرىم جىلدامدىقپەن جەرگە سوعىلۋى كەزىندەگى جاعدايدى جي ارقىلى مودەلدەۋدى سۇرايمىن. مۇنداي سوقتىعىسۋ كەزىندە، ءتىپتى ول ءبىر سەكۋندتىڭ ءبىر بولىگىنە عانا سوزىلسا دا، امان قالۋ مۇمكىن ەمەس. مەديتسينالىق قورىتىندى جاساعاندا بۇل فاكتور ەسكەرىلۋى ءتيىس»، – دەدى ادۆوكات.
دەرجاۆەتستىڭ ۇسىنىسىن ادۆوكات نۇرلان حاليكوۆ تا قولدادى. ونىڭ ايتۋىنشا، تەرگەۋ بارىسىندا كوپتەگەن ماڭىزدى اسپەكتىلەر ەسكەرىلمەي قالعان، ال كەيبىر ساراپتامالار ءۇستىرت جۇرگىزىلگەن.
«قىلمىستىق پروتسەستى جۇرگىزەتىن ورگان، ەگەر ساراپتاما ىسكە قاتىستى بولسا، ونى تاعايىنداۋدان باس تارتۋعا قۇقىلى ەمەس. ءبىز كوتەرىپ وتىرعان ماسەلەلەر تىكەلەي ءولىم سەبەبىنە بايلانىستى»، – دەدى ول.
ايتا كەتەيىك، 2019 جىلى الماتى ماڭىندا اپاتقا ۇشىراعان Bek Air ۇشاعىنا قاتىستى تەرگەۋ ءىسى اياقتالعانى حابارلانعان.
