ءماجىلىس دەپۋتاتى نارتاي سارسەنعاليەۆ قوعامداعى “قاۋىپتى پرانكتەرگە” قاتىستى قاتاڭ شارا قابىلداۋدى ۇسىندى، دەپ حابارلايدى “ادىرنا” ۇلتتىق پورتالى.
دەپۋتات قوعامدا كەڭ ەتەك جايعان پرانك بەينەروليكتەرگە بايلانىستى ۇكىمەتكە ساۋال جولدادى.
دەپۋتاتتىڭ ايتۋىنشا، سوڭعى ۋاقىتتا الەۋمەتتىك جەلىلەردە ادامدى قورقىتۋ، قوعامدىق ورىندا ادەپسىز ارەكەتتەر جاساۋ، وزگە ادامنىڭ جەكە ومىرىنە قول سۇعۋ سياقتى ء«ازىل» تۇرىندە تۇسىرىلگەن بەينەلەر كوبەيىپ كەتكەن.
«پرانكپەن پاراقشاسىنداعى ءلۇپىلدىڭ سانىن ارتتىرعانمەن، پاراسات بيىگىنەن وماقاسا قۇلاعاندار قاپتاپ كەتتى. قوعامدا پرانكتى قىزىق كورىپ، اقىلعا سىيمايتىن ارەكەت جاساپ جۇرگەندەر از ەمەس»، – دەدى نارتاي سارسەنعاليەۆ.
ول ناقتى مىسالدار كەلتىرىپ، استانادا ليفت ىشىنە «جالعان ءمايىت» كىرگىزىپ، ادامداردى شوشىتقان، تاپانشامەن قوعامدىق ورىندا ۆيدەو تۇسىرگەن، الماتىدا اۋلا سىپىرۋشىلاردى مازاق ەتكەن بلوگەرلەردىڭ ارەكەتتەرىن سىنعا الدى.
سونداي-اق دەپۋتات شەتەلدە قازاقستاننىڭ ابىرويىنا نۇقسان كەلتىرگەن پرانكتەرگە دە توقتالدى. ونىڭ سوزىنشە، قىتاي مەن وزبەكستاندا تۇسىرىلگەن كەي ۆيدەولار ەل يميدجىنە كەرى اسەرىن تيگىزىپ وتىر.
«ويىننان دا ومىرتقا سىناتىنىن بىلمەيتىن بلوگەر-سىماقتاردى قاتاڭ جاۋاپقا تارتاتىن كەز كەلدى. بۇل – ادامنىڭ جەكە ومىرىنە قول سۇعۋ، قوعامدىق ءتارتىپتى بۇزۋ»، – دەدى ول.
سارسەنعاليەۆ سوڭعى ۋاقىتتا جاساندى ينتەللەكت ارقىلى جاسالعان پرانكتەردىڭ دە كوبەيگەنىنە الاڭداۋشىلىق ءبىلدىردى. مۇنداي بەينەلەردە مەملەكەتتىك تۇلعالار نەمەسە قاراپايىم ازاماتتاردىڭ جالعان بەينەسى جاسالىپ، قوعامدا شاتاسۋ تۋىنداۋدا.
وسىعان وراي ول ۇكىمەت پەن ءتيىستى ورگاندارعا ارنايى شارالاردى قابىلداۋدى ۇسىندى.
قىرعىزستاندا 20 جاسقا تولماعان قىزدارعا كۇيەۋسىز نەمەسە اتا-اناسىز ەلدەن شىعۋعا تىيىم سالۋ ۇسىنىلادى
