بولات ءابىشۇلى نازارباەۆتىڭ مۇلكىن ءبولۋ پروتسەسى باستالدى، دەپ حابارلايدى "ادىرنا" ۇلتتىق پورتالى Beksport-قا سىلتەپ.
باق بەتتەرىندە قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ تۋعان ءىنىسى، كاسىپكەر بولات ءابىشۇلى نازارباەۆتىڭ قايتىس بولۋىنا بايلانىستى ونىڭ ارتىندا قالعان مۇلىكتى ءبولۋ پروتسەسى رەسمي تۇردە باستالعانى حابارلاندى.
رەسمي دەرەكتەردە تاراعان اقپاراتقا سايكەس، مۇراگەرلىك ءىس 2024 جىلعى 3 قاڭتاردا №1/2024 نومىرىمەن نوتاريۋس ب.ق. يساباەۆتىڭ باستاماسىمەن اشىلعان. بۇل ءىس بويىنشا بولات نازارباەۆتىڭ تۋىستارى مەن جاقىندارى مۇراگەرلىك قۇقىعىن الۋ ءۇشىن ءوتىنىش بەرگەن.
مۇراگەرلىككە قاتىستى وتىنىشتەر زاڭعا سايكەس بىرلەسىپ جينالعان مۇلىكتىڭ ۇلەسىن ءبولۋ جانە مىندەتتى ۇلەسكە يە بولۋ قۇقىعىن قامتيدى. ءوتىنىش بىلدىرگەندەر اراسىندا بولات نازارباەۆتىڭ بىرنەشە نەكەدەن تۋعان ۇل-قىزدارى مەن ايەلى بار.
ناقتىراق، 1983 جىلى تۋعان نۇربول بولاتۇلى نازارباەۆ وسيەت بويىنشا مۇراگەرلىك قۇقىعىن الۋ ءۇشىن ءوتىنىش بەرگەن. "جۇبايى" دەپ تانىلعان دينارا كەمەلحانقىزى نازارباەۆا نەكەدە بىرگە الىنعان مۇلىكتىڭ 1/2 ۇلەسىن بولۋگە ءوتىنىش تۇسىرگەن.
ودان بولەك، زاڭ بويىنشا مۇرانىڭ مىندەتتى ۇلەسىنە ءوتىنىش بەرگەن ون ءۇش بالانىڭ بار ەكەنى ايتىلدى.
ولاردىڭ قاتارىندا 2002 جىلى تۋعان حانبولات بولاتۇلى، 2003 جىلى تۋعان البينا بولاتقىزى، 2010 جىلى تۋعان جانەل بولاتقىزى، 2012 جىلى تۋعان بولاتۇلى بولاتحان، 2013 جىلى تۋعان ەلنۇر جانە توميريس، 2014 جىلى تۋعان بولات بولاتۇلى، 2016 جىلى تۋعان اكبار مەن ارۋناز، 2018 جىلى تۋعان ءۇش بالا ەركەجان بولاتقىزى، نۇربانۋ بولاتقىزى، حانتورە بولاتۇلى مەن 2021 جىلى تۋعان مۇحاممەد بولاتۇلى نازارباەۆ بار.
ايتا كەتەيىك، قر بۇرىنعى پرەزيدەنتى نۇرسۇلتان نازارباەۆتىڭ تۋعان ءىنىسى بولات ءابىشۇلى نازارباەۆ 1953 جىلى 17 مامىردا الماتى وبلىسىندا دۇنيەگە كەلگەن. ول 2023 جىلدىڭ 13 قاراشاسىندا 70 جاسىندا الماتى قالاسىنداعى اۋرۋحانادا ومىردەن ءوتتى.
ونىڭ ارتىندا قالعان مۇرانىڭ ناقتى كولەمى مەن قۇرامى ازىرگە جاريالانعان جوق.
