پوليتسيا ريو-دە-جانەيرو قالاسىنداعى كەدەي اۋدانداردا قىلمىستىق توپقا قارسى اۋقىمدى وپەراتسيا جۇرگىزدى. قاقتىعىس كەزىندە 121 ادام، ونىڭ ىشىندە ءتورت پوليتسەي قازا تاپتى، دەپ حابارلايدى «ادىرنا».
برازيليا بيلىگىنىڭ مالىمەتىنشە، وپەراتسيانىڭ باستى ماقساتى – ەلدىڭ ەڭ قاۋىپتى ەسىرتكى كارتەلدەرىنىڭ ءبىرى سانالاتىن Comando Vermelho توبىنىڭ ىقپالىن جويۋ بولعان. رەيدكە شامامەن 2,5 مىڭ پوليتسيا مەن اسكەري قىزمەتكەر قاتىسىپ، بروندالعان كولىكتەر مەن تىكۇشاقتار، سونداي-اق دروندار قولدانىلعان.
وقيعا ريو-دە-جانەيرونىڭ ەڭ قاۋىپتى ايماقتارىنىڭ ءبىرى سانالاتىن Penha جانە Complexo do Alemão فاۆەلالارىندا بولعان.
پوليتسيانىڭ مالىمەتىنشە، وپەراتسيا بارىسىندا 121 ادام، ونىڭ ىشىندە 4 پوليتسيا قىزمەتكەرى قازا تاپقان. ال ادام قۇقىقتارىن قورعاۋشىلار مەن جەرگىلىكتى تۇرعىندار بيلىك كۇش قۇرىلىمدارىنىڭ ارەكەتىن شەكتەن تىس قاتىگەزدىك دەپ باعالاپ وتىر.
كۋاگەرلەردىڭ ايتۋىنشا، اتىس بىرنەشە ساعاتقا سوزىلىپ، كەيبىر تۇرعىندار ءوز ۇيلەرىندە قامالىپ قالعان. الەۋمەتتىك جەلىلەردە تاراعان بەينەجازبالاردا كوشەلەردە وق تەسكەن كولىكتەر مەن قانعا بويالعان دەنەلەر كورىنىس تاپقان.
برازيليا پرەزيدەنتى لۋيس يناسيۋ لۋلا دا سيلۆا وقيعاعا بايلانىستى مالىمدەمە جاساپ، ادام شىعىنىنىڭ كوپتىگىنە "تەرەڭ الاڭداۋشىلىق ءبىلدىردى". ال ريو شتاتىنىڭ گۋبەرناتورى كلاۋديو كاسترو وپەراتسيانى "قاجەتتى ءارى ءساتتى ءوتتى" دەپ قورعاپ، قازا تاپقانداردىڭ بارلىعى "قارۋلى قىلمىسكەرلەر" دەپ مالىمدەدى.
بىراق قۇقىق قورعاۋشىلار بۇل نۇسقامەن كەلىسپەيدى. Amnesty International جانە بۇۇ-نىڭ ادام قۇقىقتارى جونىندەگى باسقارماسى وقيعاعا بايلانىستى تاۋەلسىز تەرگەۋ جۇرگىزۋدى تالاپ ەتتى. ولار پوليتسيانىڭ بەيبىت تۇرعىندارعا دا وق اتقان بولۋى مۇمكىن ەكەنىن ايتادى.
بۇل وپەراتسيا برازيليا تاريحىنداعى ەڭ قاندى پوليتسيا رەيدى رەتىندە تىركەلىپ وتىر. بۇعان دەيىن دە ەلدىڭ بىرنەشە شتاتىندا ەسىرتكى ساۋداسىنا قارسى وپەراتسيالار كەزىندە ادام شىعىنى ءجيى تىركەلگەن، بىراق مۇنشالىق اۋقىمدى قاقتىعىس بولماعان.
قازىر ريو-دە-جانەيرو كوشەلەرىندە تۇرعىندار بيلىك ارەكەتىنە قارسى نارازىلىق اكتسيالارىن وتكىزىپ، "زورلىققا قارسى بەيبىت جولدى" تالاپ ەتۋدە.
