برازيلياداعى پرەزيدەنت سايلاۋى. لۋلا مەن بولسونارۋ اۋلەتى تاعى دا ساياسي ايقاسقا تۇسەدى

برازيليادا پرەزيدەنت سايلاۋىنىڭ ءبىرىنشى كەزەڭى جەڭىمپازسىز اياقتالدى. ەكىنشى تۋرعا قازىرگى پرەزيدەنت لۋيس يناسيۋ لۋلا دا سيلۆا مەن بۇرىنعى پرەزيدەنت جاير بولسونارۋدىڭ ۇلى، سەناتور فلاۆيۋ بولسونارۋ ءوتتى، دەپ حابارلايدى «ادىرنا» ءتىلشىسى BBC-گە سىلتەمە جاساپ.

داۋىس بەرۋ بيۋللەتەندەرىنىڭ 98,64%-ى سانالعاننان كەيىن فلاۆيۋ بولسونارۋ 47,27% داۋىس جيناسا، لۋلا دا سيلۆا 44,88% قولداۋعا يە بولعان. وسىلايشا، بۇرىنعى پرەزيدەنتتىڭ ۇلى قازىرگى مەملەكەت باسشىسىنان شامامەن ەكى پايىزعا وزىپ شىقتى.

سايلاۋعا جالپى سانى 12 كانديدات قاتىسقان. ءبىرىنشى تۋردا جەڭىسكە جەتۋ ءۇشىن كانديدات 50%-دان استام داۋىس جيناۋى ءتيىس ەدى. ەكىنشى كەزەڭ 25 قازاندا وتەدى.

سايلاۋ ناتيجەسى ساراپشىلار ءۇشىن كۇتپەگەن جاعداي بولدى. سايلاۋ الدىنداعى ساۋالنامالاردىڭ باسىم بولىگى لۋلا دا سيلۆانىڭ ازداعان باسىمدىعىن كورسەتكەنىمەن، كانديداتتار اراسىنداعى ايىرماشىلىق ستاتيستيكالىق قاتەلىك شەگىندە بولعان.

لۋلا دا سيلۆا العاشقى تۋردىڭ وزىندە جەڭىسكە جەتەمىن دەپ ۇمىتتەنگەنىن ايتتى.

«ويىن ەندى عانا باستالدى»،– دەدى پرەزيدەنت.

ونىڭ سوزىنشە، ەندى سايلاۋالدى شتابى ءوز قاتارىنا كوبىرەك سايلاۋشى تارتۋعا كۇش سالادى.

وڭشىل باعىتتاعى ليبەرالدىق پارتيانىڭ وكىلى فلاۆيۋ بولسونارۋ دا ناتيجەگە كوڭىلى تولاتىنىن ايتىپ، ەكىنشى تۋردا جەڭىسكە جەتەتىنىنە سەنىم ءبىلدىردى.

فلاۆيۋ بولسونارۋ اكەسىنىڭ ساياسي باعىتىن جالعاستىرۋشى رەتىندە قاراستىرىلادى. جاير بولسونارۋ برازيليانى 2019–2023 جىلدارى باسقارعان. ونىڭ ۇلى قىلمىسقا قارسى كۇرەستى كۇشەيتۋدى، ازاماتتاردىڭ قارۋ يەلەنۋ مۇمكىندىگىن كەڭەيتۋدى جانە اۋىل شارۋاشىلىعى سالاسىنداعى رەتتەۋشى تالاپتاردى ازايتۋدى قولدايدى.

ال سولشىل جۇمىسشىلار پارتياسىنىڭ وكىلى لۋلا دا سيلۆا جەڭىسكە جەتسە، قازىرگى ۇكىمەتتىڭ ساياساتىن جالعاستىرۋعا مۇمكىندىك الادى. ونىڭ باعدارلاماسىندا الەۋمەتتىك جوبالاردى دامىتۋ، كەدەيلىكپەن كۇرەس جانە امازونيا ورماندارىن قورعاۋ ماسەلەلەرى قامتىلعان. دەگەنمەن، ەكولوگيا سالاسىنداعى كەيبىر شەشىمى سىنعا ۇشىراپ كەلەدى.

ەسكە سالساق، 2022 جىلعى پرەزيدەنت سايلاۋىندا لۋلا دا سيلۆا جاير بولسونارۋدى 1,8 پايىزدىق تارماق ايىرماشىلىعىمەن جەڭگەن بولاتىن. وسىلايشا برازيلياداعى پرەزيدەنتتىك دودا تاعى دا لۋلا مەن بولسونارۋ اۋلەتىنىڭ تەكەتىرەسىنە اينالىپ وتىر.