الماتىداعى تيميريازەۆ كوشەسىندە قالا اۆتوبۋسىمەن جول اپاتى بولدى. وقيعا ۆيدەوسى الەۋمەتتىك جەلىلەردە تارادى، دەپ حابارلايدى "ادىرنا".
كۋاگەرلەردىڭ مالىمەتىنشە، قوعامدىق كولىك جۇرگىزۋشىسى باعدارشامنىڭ قىزىل شامىنا ەكى رەت ءوتىپ، جاياۋ جۇرگىنشىنى قاعىپ كەتكەن.
بەينەجازبادا ايالدامادا تۇرعان ادامداردىڭ جۇرگىزۋشىگە توقتاۋدى ايقايلاپ ەسكەرتكەنىن كورۋگە بولادى. جاراقات العان ادامعا وقيعا ورنىندا كۋاگەرلەر العاشقى كومەك كورسەتكەن.
جاياۋ جۇرگىنشىنىڭ جاعدايى تۋرالى رەسمي اقپارات ءالى جاريالانعان جوق.
پوليتسيا مالىمەتىنشە، 102 نومىرىنە جول اپاتى تۋرالى قوڭىراۋ تۇسپەگەن، الايدا قوعامدىق قاۋىپسىزدىك باسقارماسى تەكسەرىس جۇرگىزىپ جاتىر.
وقيعانىڭ بارلىق ءمان-جايى انىقتالىپ، زاڭ اياسىندا شارالار قابىلدانادى، – دەدى پوليتسيادا.
قازىر قۇقىق قورعاۋ ورگاندارى جۇرگىزۋشىنىڭ جول ەرەجەسىن بۇزعان-بۇزباعانىن جانە اۆتوبۋستا تەحنيكالىق اقاۋلاردىڭ بار-جوعىن تەكسەرىپ جاتىر.
