ۆەتنامنىڭ ورتالىق ايماعىندا بولعان جويقىن سۋ تاسقىنى سالدارىنان 28 ادام قازا تاۋىپ، 6 ادام ءىز-ءتۇزسىز جوعالدى، دەپ حابارلايدى "ادىرنا" ۇلتتىق پورتالى Report.az-عا سىلتەپ.
جەرگىلىكتى باق دەرەگىنە سۇيەنسەك، 43 ادام جاراقات العان. ەڭ كوپ زارداپ شەككەن وڭىرلەر — حاتين، كۋانگنگاي جانە لام دونگ پروۆينتسيالارى.
بيلىك وكىلدەرىنىڭ مالىمەتىنشە، اپات كەزىندە 133 مىڭنان استام ءۇيدى سۋ باسقان، ولاردىڭ 22 مىڭنان استامى ءالى دە سۋ استىندا قالىپ وتىر. تابيعي اپات سالدارىنان 22 مىڭنان استام مال مەن قۇس قىرىلىپ، 245 مىڭ تۇتىنۋشى ەلەكتر جارىعىنسىز قالعان.
قۇتقارۋ قىزمەتتەرى زارداپ شەككەن اۋدانداردا تۇرعىنداردى ەۆاكۋاتسيالاپ، ازىق-تۇلىك پەن گۋمانيتارلىق كومەك جەتكىزۋدى جالعاستىرىپ جاتىر.
ەسكە سالا كەتسەك، بۇعان دەيىن ۆەتنامدا سۋ تاسقىنى مەن كوشكىن سالدارىنان 10 ادامنىڭ قازا تاپقانى حابارلانعان ەدى. مامانداردىڭ ايتۋىنشا، سوڭعى اپتاداعى تولاسسىز جاڭبىر مەن وزەندەردىڭ ارناسىنان شىعۋى اپات اۋقىمىن ۇلعايتا تۇسكەن.
