باس پروكۋراتۋرا قازاقستاندىقتارعا ينتەرنەتتەگى قاۋىپتى جۇمىس ۇسىنىستارى تۋرالى ەسكەرتۋ جاسادى ، دەپ حابارلايدى “ادىرنا”.
ۆەدومستۆونىڭ مالىمەتىنشە، ينتەرنەت-الاياقتار تانىمال پلاتفورمالار مەن الەۋمەتتىك جەلىلەردە از تالاپ قويىپ، جوعارى تابىس ۋادە ەتەتىن جۇمىس تۋرالى حابارلاندىرۋلار جاريالاپ ءجۇر.
«جاۋاپ بەرگەن ۇمىتكەرلەرگە جالعان سايتتارعا سىلتەمەلەر، جەكە دەرەكتەردى جيناۋعا ارنالعان ساۋالنامالار جىبەرىلەدى نەمەسە “جۇمىسقا ارنالعان ءموبيلدى قوسىمشانى” ورناتۋ ۇسىنىلادى. مۇنداي قوسىمشالار الاياقتارعا بانكتىك دەرەكتەرگە، مەسسەندجەرلەرگە جانە قۇرىلعىنى باسقارۋعا قول جەتكىزۋگە مۇمكىندىك بەرەدى»، — دەلىنگەن حابارلامادا.
IT, مودەلدىك، قوناق ءۇي بيزنەسى نەمەسە call-ورتالىقتار سالاسىندا جۇمىس ۇسىنامىز دەگەن جەلەۋمەن ازاماتتاردى شەتەلگە جۇمىسقا شاقىرىپ، ولاردى ەڭبەك جانە جىنىستىق قۇلدىققا، سونداي-اق ءتۇرلى قاناۋ مەن زورلىق-زومبىلىققا ۇشىراتۋى مۇمكىن. كەي جاعدايلاردا جابىرلەنۋشىلەردى باسقا ازاماتتاردى الداۋ نەمەسە ادام اعزالارىن زاڭسىز الۋ سحەمالارىنا قاتىسۋعا ماجبۇرلەيدى.
