تارازدا كوشەدە قىزدى “الىپ قاشپاق” بولعان جىگىتتىڭ ءىسى بويىنشا سوتتا قىز العاش رەت ءوز نۇسقاسىن ايتتى. ول وقيعا كەزىندە كۇيەۋ جىگىتىن تانىماي قالىپ، قورىققاننان كومەك سۇراعانىن جەتكىزدى. بۇل تۋرالى كتك تەلەارناسىنا جاريالادى، دەپ حابارلايدى “ادىرنا”
قىزدىڭ ايتۋىنشا، ول كۇدىكتىمەن التى جىلدان استام ۋاقىت بويى تانىس — ەكەۋى كەزدەسىپ جۇرگەن جانە ۇيلەنۋ تويىن كوكتەمدە وتكىزۋدى جوسپارلاعان.
«مەنى ۇرلاپ كەتەدى دەپ ويلامادىم. كىم ەكەنىن تۇسىنبەدىم. ال كولىكتىڭ ىشىندە وتىرىپ، قوزعالىپ كەتكەن سوڭ، رولدە مەنىڭ جىگىتىم وتىرعانىن كوردىم. ءبىز باعدارشامدا توقتاعاندا، كولىكتەن ءتۇسىپ، ۇيگە كەتىپ قالدىم»، — دەدى ول.
تەرگەۋ كەزىندە بۇلتارتپاۋ شاراسىن تاڭداۋ بويىنشا وتكەن سوتتا جاستار وزدەرىن تۇسىرۋگە تىيىم سالدى. ناتيجەسىندە سوت كۇدىكتىلەردى ءۇي قاماعىنا الىپ، ارنايى ەلەكتروندى بىلەزىك تاعۋعا شەشىم شىعاردى. ولارعا كوشەگە شىعۋعا جانە سىرتقى الەممەن بايلانىس ورناتۋعا تىيىم سالىنعان.
ەسكە سالا كەتەيىك، بۇعان دەيىن تارازدا كۇندىز كوپشىلىكتىڭ كوزىنشە بەلگىسىز ادامدار قىزدى كۇشتەپ كولىككە وتىرعىزىپ، الىپ كەتكەن بولاتىن. كۋاگەرلەر ارالاسۋعا تىرىسقانىمەن، ۇرلاۋدىڭ الدىن الا المادى. وقيعا اۆتوبۋس ايالداماسىنىڭ ماڭىندا بولىپ، بەينەجازباعا ءتۇسىپ قالعان.
اتالعان دەرەك بويىنشا قىلمىستىق كودەكستىڭ 125-1-بابى — “نەكە قيۋعا ماجبۇرلەۋ” بابى بويىنشا ءىس قوزعالدى.
