وزبەكستاننىڭ تاشكەنت وبلىسىنداعى كونە قانقا قالاشىعىنان ارحەولوگتار ەجەلگى عيباداتحانا مەن ەرتە ورتا عاسىرلارعا ءتان جاۋىنگەرلىك ساۋىتتاردىڭ بولشەكتەرىن تاپتى، دەپ حابارلايدى" ادىرنا" ۇلتتىق پورتالى Arkeonews-كە سىلتەمە جاساپ.
زەرتتەۋ جۇمىستارىن وزبەكستان عىلىم اكادەمياسىنىڭ تاريح ينستيتۋتى جۇرگىزىپ جاتىر. عالىمداردىڭ ايتۋىنشا، V–VII عاسىرلارعا جاتاتىن سازدان تۇرعىزىلعان بۇل عيباداتحانا ءتۇرلى رەلەفتەرمەن بەزەندىرىلگەن جانە ول اسكەري قۇرباندىقتار جاسالاتىن كيەلى ورىن بولعان بولۋى مۇمكىن. توبەسى استىنان تابىلعان مەتالل پلاستينالار مەن ساۋىتتىڭ بەكىتكىشتەرى جاۋىنگەرلەردىڭ قۇدايلارعا ارناعان تارتۋى رەتىندە قالدىرىلعان دەپ بولجانۋدا.
كونە قانقا قالاسى ب.ز.د. III عاسىردا نەگىزى قالانعان جانە مىڭ جىلدان استام ۋاقىت بويى ۇلى جىبەك جولىنىڭ ماڭىزدى ساۋدا جانە مادەني ورتالىعى بولعان. ارحەولوگتار بۇل تابىستىڭ تۇركى حالىقتارىنىڭ سوعىس پەن رۋحاني سەنىم اراسىنداعى بايلانىسىن ايقىن كورسەتەتىنىن اتاپ وتەدى.
ەكسپەديتسيا جەتەكشىسى رۋستام راحيموۆتىڭ ايتۋىنشا، بۇل جاڭالىق ەجەلگى تۇران ايماعىنداعى ءدىني جانە جاۋىنگەرلىك داستۇرلەردىڭ تىعىز ساباقتاستىعىن دالەلدەيدى. الداعى ۋاقىتتا قانقا قالاشىعىنىڭ ورنىندا اشىق اسپان استىنداعى ارحەولوگيالىق پارك قۇرۋ جوسپارلانىپ وتىر. وندا كەلۋشىلەر ەجەلگى حرامداردىڭ جانە بەكىنىس قابىرعالارىنىڭ قالدىقتارىن ءوز كوزدەرىمەن كورە الادى.
