باستى بەت
شىعارماشىلىق
«قالامگەر ۇستاحاناسى». استانادا كورنەكتى جازۋشى-دراماتۋرگ روزا مۇقانوۆامەن كەزدەسۋ ءوتتى

«قالامگەر ۇستاحاناسى». استانادا كورنەكتى جازۋشى-دراماتۋرگ روزا مۇقانوۆامەن كەزدەسۋ ءوتتى

07.11.2025

939

https://www.adyrna.kz/storage/uploads/9Xz2bvN7fERtzjdJ62CXiefs6mWBB416WeAbMIzj.jpg

استانا قالاسى تىلدەردى دامىتۋ جانە ارحيۆ ءىسى باسقارماسىنىڭ قولداۋىمەن جۇزەگە اسىپ كەلە جاتقان قازاقستان جازۋشىلار وداعى استانا فيليالىنىڭ «قالامگەر ۇستاحاناسى» جوباسى اياسىندا بۇگىنگە دەيىن 7 قالامگەر ءارتۇرلى تاقىرىپتا ءدارىس وقىدى. سەگىزىنشى بولىپ كورنەكتى جازۋشى-دراماتۋرگ، اباي اتىنداعى مەملەكەتتىك سىيلىقتىڭ لاۋرەاتى روزا مۇقانوۆا تاجىريبەسىمەن ءبولىستى، دەپ حابارلايدى "ادىرنا" ۇلتتىق پورتالى ەلوردا اكىمدىگىنىڭ رەسمي سايتىنا سىلتەپ.

«قازاق دراماتۋرگياسى: سيۋجەت، يدەياسى جانە كوركەمدىك ءتاسىل» اتتى ءدارىسى №5 قالالىق بالالار كىتاپحاناسىندا ءوتىپ، وعان قالا اكىمىنىڭ ورىنباسارى ەسەت بايكەن قاتىستى

ءدارىستى اشىپ بەرگەن جازۋشىلار وداعىنىڭ استانا فيليالىنىڭ ديرەكتورى، بەلگىلى اقىن باۋىرجان باباجانۇلى بۇل جوبا جىل اياعىنا دەيىن جالعاساتىنىن اتاپ ءوتتى. جالپى ەلوردا اكىمدىگى استانالىق قالامگەرلەرگە كوپ قولداۋ كورسەتىپ كەلە جاتقانىن، «قالامگەرلەر ۇستاحاناسىمەن» قاتار جاس قالامگەرلەر اراسىندا كۋيز وتكىزۋ قولعا الىنعانىن ايتتى.

وسىدان كەيىن ءسوز العان روزا مۇقانوۆا ادەبيەتكە قالاي كەلگەنىن اڭگىمەلەدى.

«وزگە قالامگەرلەر سياقتى مەن دە ادەبيەتكە قۇشتارلىقپەن كەلدىم. ادەبيەت ارمان، ماقسات بولدى. وسى ۇلكەن جولدا ماعان ىقپال ەتكەن، ادەبيەتكە قۇشتارلىقتى وياتقان مەنىڭ اكەم – قاجىعالىم قاجىبايۇلى مۇقانوۆ. ول كىسى ءوز زامانىندا اۋىل-اۋىلدى ارالاپ، حالىق اۋىز ادەبيەتىن جينادى.
 
زەرتتەلمەگەن، ايتىلماي جاتقان، كومەسكىلەنىپ جاتقان دۇنيەلەردى جيناۋمەن اۋەستەندى. ايتىس اقىندارىن، اسىرەسە اسەتتىڭ قولجازبالارىن ەل ىشىنەن جينادى. ءسويتىپ عىلىم اكادەمياسىنا تاپسىرىپ ءجۇردى. اكەمنىڭ ادەبيەتكە دەگەن ماحابباتى، ادەبيەتكە قۇشتارلىعى مەنى دە قۇشتار ەتتى»، – دەدى روزا مۇقانوۆا.

قالامگەر ءدارىسى ەكى ساعاتقا سوزىلىپ، تىڭداۋشىلار ادەبيەت جايىندا، روزا مۇقانوۆانىڭ شىعارماشىلىعى جونىندە، ونىڭ زامانداس جازۋشىلارى تۋرالى قىزىقتى مالىمەتتەرگە قانىقتى.