تالعار اۋدانىنىڭ پوليتسياسى تالعار قالاسىنىڭ اكىمى ارىستانبەك ءابىلحايىرۇلى مەن ونىڭ ورىنباسارىن ۋاقىتىلى قار مەن مۇزدى تازالاماعانى ءۇشىن جاۋاپكەرشىلىككە تارتتى، دەپ حابارلايدى "ادىرنا".
پوليتسيانىڭ مالىمەتىنشە، اكىمدىك كوشە-جول جەلىسىن تازالاۋ، قوزعالىس قاۋىپسىزدىگىن قامتاماسىز ەتۋ جانە ينفراقۇرىلىمدىق نىسانداردى كۇتىپ ۇستاۋ بويىنشا تالاپتاردى ورىنداماعان.
«تالعار قالاسىنىڭ اكىمى مەن ونىڭ ورىنباسارى اكىمشىلىك قۇقىقبۇزۋشىلىق تۋرالى كودەكستىڭ 631-بابىنىڭ 1-بولىگى بويىنشا ايىپپۇلعا تارتىلدى. سونىمەن قاتار، “تۇرعىن ءۇي” جانە “الماتى جولدارى” مەردىگەر ۇيىمدارى قىسقى ماۋسىمدا جول كۇتىمىنە قاتىستى كەلىسىمشارتتىق مىندەتتەمەلەرىن ورىنداماعانى ءۇشىن جاۋاپقا تارتىلدى»، – دەپ حابارلادى اۋداندىق پوليتسيا باسقارماسى.
كودەكس بويىنشا ايىپپۇل مولشەرى 10 ايلىق ەسەپتىك كورسەتكىشتى (39 320 تەڭگە) قۇرايدى.
اكىم سىنعا جاۋاپ بەردى
وقيعادان كەيىن قالا اكىمى ارىستانبەك ءابىلحايىرۇلى الەۋمەتتىك جەلىدە سىن ايتقان تۇرعىندارعا جاۋاپ بەرىپ، ولاردى بىرگە شىعىپ، كوشەلەردى تازالاۋعا شاقىردى.
«ەگەر وزدەرىڭىز سونداي بەلسەندى بولساڭىزدار، ەرتەڭ مەنىمەن بىرگە قالا ءۇشىن جۇمىس ىستەيىك»، – دەدى ول ءوز جازباسىندا.
بۇل مالىمدەمە الەۋمەتتىك جەلى قولدانۋشىلارى اراسىندا قىزۋ تالقىلانىپ، پىكىرتالاس تۋدىردى. كوپشىلىك اكىمنىڭ مىندەتى — كوممۋنالدىق قىزمەتتەردىڭ جۇمىسىن ۇيلەستىرۋ ەكەنىن اتاپ ءوتتى.
