8 قاراشادا استاناداعى تاۋەلسىزدىك داڭعىلى، 24ب مەكەنجايىنداعى توعىز قاباتتى ءۇيدىڭ قاسبەتى قۇلاپ، بىرنەشە ادام جاراقات العان. سولاردىڭ ءبىرى - مەديتسينا قىزمەتكەرى، دەپ حابارلايدى "ادىرنا" ۇلتتىق پورتالى.
جاراقات العان بەس ادامنىڭ ءبىرى - جەدەل جاردەم فەلدشەرى. 23 جاستاعى ۇلدانا مىرزۋانعا كىرپىش قاپتاماسى مەن كونديتسيونەر قوندىرعىسى قۇلاعان. ول اۋىر باس-مي جاراقاتىمەن رەانيماتسيادا جاتىر.
فەلدشەردىڭ كۇيەۋى ادىلەت زەينەلدىڭ ايتۋىنشا، وقيعا كۇنى ۇلدانا زارداپ شەككەندەرگە كومەككە ءبىرىنشى بولىپ جۇگىرگەن. سول ساتتە وعان كىرپىش پەن كونديتسيونەر قۇلاپ تۇسكەن. ول باسىنا اۋىر جاراقات الىپ، وتا جاسالدى.
ناۋقاستان گەماتوما الىنىپ، مي قىسىمى ازايتىلعان. قازىر دارىگەرلەر ونىڭ جاعدايىن تۇراقتاندىرۋ ءۇشىن بىرنەشە پرەپارات قولدانۋدا، بىراق قاندايدا ءبىر بولجام جاساۋ قيىن ەكەنىن حابارلاعان.
زارداپ شەككەننىڭ ايەلدىڭ تۋىستارى وقيعانىڭ سەبەبىن عيماراتتىڭ ءتيىستى تەكسەرىلمەۋىندە جانە جوندەۋ جۇمىستارىنىڭ دۇرىس ۇيىمداستىرىلماۋىندا دەپ سانايدى.
ۇلدانا مىرزۋاننىڭ كۇيەۋى ادىلەت زەينەلدىڭ ايتۋىنشا، ولار جاقىندا وتباسىن قۇرعان. جەلىدە تويدا تۇسكەن سۋرەتتەر تاراپ جاتىر.
قازىرگى كەزدە استانانىڭ دەنساۋلىق ساقتاۋ باسقارماسى بۇل وقيعانى وندىرىستىك جاراقات رەتىندە تانىپ، تەرگەۋ جۇرگىزىلىپ جاتقانىن حابارلادى.
فەلدشەردىڭ تۋىستارى زارداپ شەككەندەردىڭ تولىق قاۋىپسىزدىگىن قامتاماسىز ەتۋ جانە شىن مانىندە كىنالىلەردى انىقتاۋ ءۇشىن تەرگەۋدىڭ ءادىل ءوتۋىن تالاپ ەتىپ وتىر.
الەۋمەتتىك جەلىدە وقيعاعا قاتىستى ءتۇرلى پىكىر تاراپ جاتىر.
