استانادا ءورت سالدارىنان بۇلىنگەن پاتەرلەر بيۋدجەت ەسەبىنەن جوندەلە مە؟ بۇل سۇراققا اكىمدىك جاۋاپ بەردى، دەپ حابارلايدى “ادىرنا” ۇلتتىق پورتالى.
22 ماۋسىمدا ءورت شىققان "Rixos Khan Shatyr Residences" تك قاتىستى اكىمدىك قۇرعان كوميسسيا ۇيىمداستىرۋ ماسەلەلەرىمەن اينالىسادى.
"ورتتەن زاقىم كەلگەن پاتەرلەر مەن قاسبەتتى جوندەۋ شىعىنى بيۋدجەت ەسەبىنەن وتەلمەيدى. كوميسسيا عيماراتتى ارى قاراي پايدالانۋ بويىنشا تەحنيكالىق ماسەلەلەردى قارايدى. اتالمىش ۇيدە ءورت بولعانىن ەسكەرسەك، بۇل – توتەنشە جاعداي، قالا اكىمدىگى ۇيىمداستىرۋشىلىق ماسەلەلەر بويىنشا كومەك كورسەتەدى", - دەلىنگەن حابارلامادا.
ەستەرىڭىزگە سالا كەتەيىك، 22 ماۋسىم كۇنى ساعات 15:00 شاماسىندا استانادا كوپقاباتتى تۇرعىن ۇيدەن الاپات ءورت شىققان بولاتىن. ءورتتىڭ جالپى اۋماعى 250 شارشى مەتر بولدى. قۇتقارۋشىلار 12 ادامدى، ونىڭ ىشىندە جەتى بالانى ەۆاكۋاتسيالادى.
زارداپ شەككەندەر تۋرالى اقپارات جوق. ءورتتىڭ الدىن الا سەبەبى - وتپەن جۇمىس كەزىندەگى ابايسىزدىق نەمەسە از كالوريالى وت كوزى. جالىن ەكىنشى قاباتتان 27-ءشى قاباتقا دەيىنگى تۇرعىن ءۇي كەشەنىنىڭ سىرتقى جابىندارى مەن وقشاۋلاۋىن شارپىعان.
ۇقساس جاڭالىقتار
