اتىراۋ وبلىسىنىڭ يندەر اۋدانىنىڭ كىرە بەرىسىنە اۋداننىڭ اتى جازىلعان بەلگى ورناتۋعا جەرگىلىكتى بيۋدجەتتەن 10 071 428 تەڭگە قارجى ءبولىندى، - دەپ حابارلايدى ادىرنا ۇلتتىق پورتالى goszakup.gov.kz/ سايتىنا سىلتەمە جاساپ.
يندەر اۋدانى اتىراۋ وبلىسىنداعى 33,5 مىڭ حالىق تۇراتىن ىرگەلى ەلدىمەكەندەردىڭ ءبىرى. 10,9 مىڭ كم2 الىپ جاتقان جەرى بار. اۋدان قۇرامىندا 1 كەنتتىك، 6 اۋىلدىق اكىمشىلىك وكرۋگى جانە ولارعا قاراستى 13 اۋىل بار. اۋدان ورتالىعى - يندەربور كەنتى.
وسى اۋداننىڭ كىرەبەرىسىنە ءبىر قاپتالىندا «يندەر اۋدانى»، ەكىنشى بەتىندە «جولىڭىز بولسىن!» دەگەن جازۋى بار بەلگىنى ورناتۋعا "جارسۋات اۋىلدىق وكرۋگى اكىمىنىڭ اپپاراتى" مەملەكەتتىك مەكەمەسى 10 071 428 تەڭگە بولگەن.
تەندەر 15 قىركۇيەك كۇنى جاريالانعان، جەڭىمپاز 22 قىركۇيەكتە انىقتالادى.
تەحنيكالىق سيپاتتاماداعى دەرەكتەرگە قاراعاندا بەلگىنىڭ بيىكتىگى 8 مەتر، ەنى 6,120 بولماق. قازىنادان 10 ميلليون قارجى بولىنگەن بەلگىنىڭ قۇرىلىمى تىم قاراپايىم. بەلگىنى جاساعان ماماندار ەرەكشە كوركەمدىك شەشىمدەرگە بارماعان. كەرەگەگە كەرىلگەن قوس نايزا مەن ونىڭ باسىنداعى دوڭگەلەك ىشىندەگى سۋرەتتەر سيمۆوليكالىق تۇرعىدان ءوڭىر تاريحىن ءدال سيپاتتايدى دەۋ قيىن. «جولىڭىز بولسىن!» دەگەن جازۋداعى ارىپتەردىڭ ءوزى ءبىرىزدى ەمەس.
قانات بىرلىكۇلى
ادىرنا ۇلتتىق پورتالى
