2022 جىلدان بەرى «قازاقستان حالقىنا» قوعامدىق قورى قاراعاندى وبلىسىندا جالپى قۇنى 23,9 ملرد تەڭگەنى قۇرايتىن 33 جوبانى جۇزەگە اسىردى. باستامالار ءبىلىم بەرۋ، دەنساۋلىق ساقتاۋ، سپورت جانە الەۋمەتتىك قولداۋ سالالارىن قامتيدى.
سولاردىڭ ىشىندە ەرەكشە باسىمدىق ءبىلىم سالاسىنا بەرىلگەن. بۇگىندە وڭىردە وسى باعىتتا توعىز جوبا جۇمىس ىستەپ تۇر.
ماڭىزدى جوبالاردىڭ ءبىرى – ء«بىلىم يننوۆاتسيا» ليتسەيلەرىنىڭ تاجىريبەسىن قاراعاندى، ساران، شاحتينسك، تەمىرتاۋ قالالارى مەن اباي جانە قارقارالى اۋداندارىنىڭ مەكتەپتەرىنە ەنگىزۋ.
بۇل باعدارلاما 86 مەكتەپتى قامتىپ وتىر. سەرىكتەس ۇيىم – حالىقارالىق ء«بىلىم يننوۆاتسيا» قوعامدىق قورى.
جوبا اياسىندا فيزيكا، حيميا جانە بيولوگيا كابينەتتەرى زاماناۋي زەرتحانالىق جانە ديداكتيكالىق جابدىقتارمەن جابدىقتالدى.
مۇعالىمدەر بىلىكتىلىكتى ارتتىرۋ كۋرستارىنان ءوتتى، ال وقۋ پروتسەسىنە مەنتورلىق قولداۋ كورسەتىلدى.
— ءبىز ءۇشىن جوبالاردىڭ تۇراقتىلىعى اسا ماڭىزدى، — دەيدى قوردىڭ ءبىلىم، مادەنيەت جانە سپورت سالاسىنداعى جوبالار مەن باعدارلامالاردى باسقارۋ ورتالىعىنىڭ اعا مەنەدجەرى زاۋرە بايمەنوۆا.
تەمىرتاۋداعى №1 گيمنازيانىڭ ديرەكتورى تاتيانا حوتەنوۆا وڭىردە ينجەنەرلەر مەن زەرتتەۋشىلەرگە سۇرانىس جوعارى ەكەنىن ايتادى.
— پەداگوگتاردىڭ مىندەتى – وقىتۋ پروتسەسىن زەرتتەۋشىلىك باعىتتا ءتيىمدى ۇيىمداستىرۋ. سول ارقىلى تۇلەكتەر بولاشاق ماماندىعىن ەرتەرەك تاڭداي الادى. جاڭا جابدىقتىڭ ارقاسىندا وقۋشىلار تسيفرلىق تەحنولوگيالاردى مەڭگەرۋدە، ساباقتار قىزىقتى ءارى ناتيجەلى بولا ءتۇستى، — دەيدى ول.
11-سىنىپ وقۋشىسى استامبەك ماعاۋيا حيميا ءپانىنىڭ مۇعالىمى بولۋدى ارماندايدى.
— ساباقتار ەندى الدەقايدا تارتىمدى وتەدى. وسى عىلىمعا دەگەن ىقىلاسىم ارتىپ، ماماندىق تاڭداۋىم نىعايا ءتۇستى، — دەيدى جاس تۇلەك.
ءبىلىم بەرۋ جوبالارىنىڭ تاعى ءبىر ماڭىزدى باعىتى — ەرەكشە ءبىلىم بەرۋدى قاجەت ەتەتىن بالالاردى قولداۋ.
قاراعاندى وبلىسىندا ون ارنايى مەكتەپ قامتىلعان.
مىسالى، تەمىرتاۋداعى №5 مەكتەپ-ينتەرناتتا فۋتبول، ۆولەيبول، باسكەتبول الاڭدارى، ۆوركاۋت ايماعى جانە جاتتىعۋ قۇرالدارى بار زاماناۋي سپورت ينفراقۇرىلىمى سالىندى.
— بىزدە تەك تەمىرتاۋ ەمەس، قاراعاندى مەن بۇقار جىراۋ اۋدانىنان دا بالالار وقيدى. جاڭا سپورت الاڭدارى ولاردىڭ وقۋ پروتسەسىنە ۇلكەن سەرپىن بەردى، — دەيدى مەكتەپ ديرەكتورى دينارا سمايلوۆا.
دەفەكتولوگ-مۇعالىم وكسانا مالاحوۆانىڭ ايتۋىنشا، تۇراقتى جاتتىعۋلار بالالاردىڭ زەيىنى مەن كوڭىل-كۇيىنە وڭ ىقپال ەتۋدە.
مەكتەپ-ينتەرناتتا 140 بالا وقيدى، ولاردىڭ ىشىندە سويلەۋ قابىلەتىندە اۋىر بۇزىلىستارى مەن جەڭىل دەڭگەيدەگى اقىل-وي كەمىستىگى بار بالالار بار.
قوردىڭ قولداۋىمەن مۇندا پسيحولوگ كابينەتى، سەنسورلىق جانە لوگوپەد بولمەلەرى اشىلىپ، زاماناۋي تۇزەتۋ جابدىقتارى ورناتىلدى.
سونىمەن قاتار باستاۋىش سىنىپتارعا جاراتىلىستانۋ پاندەرى بويىنشا شاعىن زەرتحانالار ساتىپ الىندى.
بۇل بالالاردىڭ وقۋ ساپاسىن ارتتىرىپ، ىنتاسىن كۇشەيتىپ وتىر.
قور بالالاردىڭ تەحنيكالىق جانە شىعارماشىلىق الەۋەتىن دامىتۋعا دا باسىمدىق بەرۋدە.
تەمىرتاۋداعى بالالاردىڭ تەحنيكالىق شىعارماشىلىق مەكتەبى جاڭعىرتىلىپ، بالالار تەحنوپاركىندە ون ۇيىرمە قايتا جابدىقتالدى.
ولاردىڭ قاتارىندا كەمە ۇلگىلەۋ سپورتى كلۋبى، اۆتومودەلدەۋ كلۋبى جانە «جاسىل مەكتەپ» بار.
سونىمەن بىرگە ءتورت جاڭا باعىت اشىلدى: تەلەستۋديا، كەمە ۇلگىلەۋ زەرتحاناسى، جاساندى ينتەللەكت پەن روبوتوتەحنيكا نەگىزدەرى جانە اقپاراتتىق پەن VR-تەحنولوگيالار زەرتحاناسى.
240-تان استام بالا 3D-مودەلدەۋ، باعدارلامالاۋ، روبوتوتەحنيكا جانە كەمە ۇلگىلەۋمەن اينالىسۋعا مۇمكىندىك الدى.
— بۇعان دەيىن مۇعالىمدەر 80-جىلدارداعى جابدىقپەن جۇمىس ىستەسە دە، وسى ورتالىقتان حالىقارالىق بايقاۋلاردىڭ جەڭىمپازدارى شىققان. ءبىز بۇل باستامالاردى قولداۋدى ءجون كوردىك. سول سەبەپتى تەمىرتاۋداعى بالالار تەحنوپاركىن جاڭعىرتۋ ەلىمىز بويىنشا پيلوتتىق جوباعا اينالدى. قازىردىڭ وزىندە ونىڭ وڭ شەشىم بولعانىن كورىپ وتىرمىز، الداعى ۋاقىتتا تاجىريبەنى باسقا دا ۇيىمداردا تاراتۋدى جوسپارلاپ وتىرمىز، — دەيدى زاۋرە بايمەنوۆا.
كەمە ۇلگىلەۋ ۇيىرمەسى تەحنوپاركتىڭ ماقتانىشى سانالادى.
ول وڭىرگە كوپتەگەن چەمپيون تاربيەلەپ شىعارعان. ۇيىرمە تۇلەكتەرى رەسپۋبليكالىق قانا ەمەس، حالىقارالىق جارىستاردا دا جەڭىسكە جەتكەن.
سولاردىڭ ءبىرى — قوسىمشا ءبىلىم بەرۋ پەداگوگى، وسى مەكتەپتىڭ تۇلەگى ءارى كەمە ۇلگىلەۋ سپورتى بويىنشا الەم چەمپيونى سەرگەي وكونەچنيكوۆ.
— جابدىقتارىمىز جىلدار بويى جاڭارتىلماعان ەدى. كەرەگىن كەيدە ءوزىم ساتىپ الاتىنمىن. ەندى بالالار زاماناۋي جابدىقپەن جۇمىس ىستەپ، ساپالى قۇرالدار پايدالانا الادى.
ەرەكشە ماقتانىشىمىز — كەمە سىناۋعا ارنالعان جابىق باسسەين. بۇل ءتىپتى ەڭ جاس سپورتشىلارعا ىڭعايلى ءارى جىل بويى جاتتىعۋ جاساۋعا مۇمكىندىك بەرەدى، — دەيدى ول.
اۋىلدىق جەرلەردەگى تىرەك مەكتەپتەردى دامىتۋ باعدارلاماسى اياسىندا ساران قالاسىنداعى اباي اتىنداعى جالپى ءبىلىم بەرەتىن مەكتەپتىڭ ماتەريالدىق-تەحنيكالىق بازاسى تولىقتاي دەرلىك جاڭارتىلدى.
— ءبىزدىڭ مەكتەپتە 22 وقۋ كابينەتى بار. ولاردىڭ بارلىعى زاماناۋي جابدىقتارمەن، جيھازبەن جانە ديداكتيكالىق ماتەريالدارمەن تولىق قامتاماسىز ەتىلدى. STEM-زەرتحانا، روبوتوتەحنيكا كابينەتى، تەلە- جانە ارت-ستۋديا اشىلدى. سونداي-اق اكت زالى مەن سپورت زالى، ەڭبەككە باۋلۋ كابينەتتەرى، پسيحولوگيالىق جانە لوگوپەدتىك قولداۋ بولمەلەرى قايتا جابدىقتالدى، — دەيدى مەكتەپ ديرەكتورى گۇلدەن سەرىكوۆا. — جاڭا جابدىقتاردىڭ كەلۋى ءبىلىم ساپاسىن ايتارلىقتاي ارتتىردى. وقۋشىلار بايقاۋلاردا جۇلدەلى ورىندار الا باستادى، عىلىمي-زەرتتەۋ جۇمىستارىنا قىزىعۋشىلىقتارى ءوستى. سونىمەن قاتار باستاۋىش سىنىپتاردا جاعداي جاقساردى: ىڭعايلى وقۋ ورىندارى جاساقتالىپ، شاحمات ۇيىرمەسى مەن تەلەجۋرناليستيكا ستۋدياسى اشىلدى.
«قازاقستان حالقىنا» قورى قاراعاندى وبلىسىندا الەۋمەتتىك ماڭىزى بار وزگە دە جوبالاردى كەزەڭ-كەزەڭىمەن جۇزەگە اسىرىپ كەلەدى.
