الماتىداعى قازاق مەديتسينالىق ۇزدىكسىز ءبىلىم بەرۋ ۋنيۆەرسيتەتى (قازمۇببۋ) ءوز جۇمىسىن توقتاتتى، - دەپ حابارلايدى "ادىرنا" ۇلتتىق پورتالى ءبىلىم جانە عىلىم مينيسترلىگىنىڭ ءباسپاسوز قىزمەتىنە سىلتەمە جاساپ.
حابارلانعانداي، قازمۇببۋ ستۋدەنتتەرى باسقا مەديتسينالىق ۋنيۆەرسيتەتتەرگە اۋىستىرىلدى. اۋىستىرۋ سوڭعى ەكى ايدا جۇزەگە اسىرىلدى، ەندى تۇلەكتەر وقۋىن جالعاستىرا الادى جانە باعدارلامانى يگەرگەن جاعدايدا جوعارى ءبىلىم تۋرالى ديپلومدار الادى.
«قازمۇببۋ-دا شامامەن 3500 ادام وقىدى. ستۋدەنتتەردىڭ كوپشىلىگى الماتى قالاسىنداعى مەديتسينالىق جوعارى وقۋ ورىندارىنا اۋىستىرىلدى. كەيبىرەۋلەرى وقۋىن نۇر-سۇلتان، قاراعاندى، سەمەي، اقتوبە، شىمكەنت جانە تۇركىستانداعى مەديتسينالىق ۋنيۆەرسيتەتتەردە جالعاستىرادى. اۋىستىرۋ كەزىندە ستۋدەنتتەر قابىلداۋشى ۋنيۆەرسيتەتتەرگە قازمۇببۋ جىبەرگەن ستۋدەنتتەردى قابىلداۋ جانە وقۋ ناتيجەلەرىن باعالاۋ كەزىندەگى زاڭ بۇزۋشىلىقتاردى جويۋ كەرەك بولدى. اۋىستىرىلعان 111 ستۋدەنتتىڭ جەكە ىستەرىندە ولارعا قاجەتتى سەرتيفيكاتتار مەن قوسىمشالار بولعان جوق. كەيبىر ستۋدەنتتەردە ۇبت سەرتيفيكاتتارى بولمادى» دەدى ءبىلىم جانە عىلىم مينيسترلىگى ءبىلىم جانە عىلىم سالاسىنداعى ساپانى قامتاماسىز ەتۋ كوميتەتى توراعاسىنىڭ ورىنباسارى گۇلجان جاراسوۆا.
سونىمەن قاتار، قازمۇببۋ ستۋدەنتتەرىن باسقا جوعارى وقۋ ورىندارىنا اۋىستىرۋ كەزىندە كەيبىر ماگيسترانتتار العىشارتتاردان وتپەي وقىعان بولىپ شىقتى. سونىمەن قاتار، كەيبىر ستۋدەنتتەر قابىلداۋ كەزىندە تالاپ ەتىلەتىن تەستىلەۋدىڭ كەيبىر ەلەمەنتتەرىنەن وتە المادى.
سونداي-اق، قازمۇببۋ ماگيسترانتتارى مەملەكەتتىك ستاندارتتىڭ مىندەتتى پاندەرىن تولىق كولەمدە وقىمادى. بىرقاتار نەگىزگى پاندەر مۇلدەم يگەرىلمەگەن. ماسەلەن، «فارماتسيا» قىسقارتىلعان باعدارلاماسى بويىنشا وقىعان ستۋدەنتتەر بەلگىلەنگەن 120 كرەديتتىڭ ورنىنا تەك 78-ءىن وقىدى.
«وسى جانە باسقا زاڭ بۇزۋشىلىقتار قازمۇببۋ ستۋدەنتتەرىن باسقا مەديتسينالىق جوعارى وقۋ ورىندارىنا اۋىستىرۋ پروتسەسىن قيىنداتتى. بۇگىنگى كۇنگە دەيىن بۇل ماسەلەلەر شەشىلدى، ستۋدەنتتەر وقۋىن باسقا ۋنيۆەرسيتەتتەردە جالعاستىرادى. قابىلداۋشى ۋنيۆەرسيتەتتەر ستۋدەنتتەرگە اكادەميالىق الشاقتىقتى يگەرۋگە مۇمكىندىك بەردى. ولار ستۋدەنتتەرگە جەتىسپەيتىن قۇجاتتاردى قالپىنا كەلتىرۋگە، وقۋداعى ولقىلىقتاردى جويۋعا جانە اعىمداعى وقۋ جىلىن ۋاقتىلى اياقتاۋعا كومەكتەسپەك»، - دەدى جاراسوۆا.
ەستەرىڭىزگە سالا كەتەيىك، اقپاندا قازمۇببۋ باس ليتسەنزياسىنان ايىرىلدى. ءبىلىم جانە عىلىم مينيسترلىگى وتكەن جىلدىڭ ورتاسىندا ۋنيۆەرسيتەت قىزمەتىندە ورەسكەل بۇزۋشىلىقتار انىقتالعانىن ءتۇسىندىردى. ءساۋىر ايىندا قازمۇببۋ-نىڭ باس ليتسەنزياسىنان ايىرۋ تۋرالى سوت شەشىمى زاڭدى كۇشىنە ەندى.
"ادىرنا" ۇلتتىق پورتالى
