الماتىدا اتاۋى جوق 156 كوشەگە رەسمي تۇردە جاڭا اتاۋلار بەرىلدى، دەپ حابارلايدى «ادىرنا» ءتىلشىسى.
ءتيىستى بىرلەسكەن قاۋلىنى قالا اكىمدىگى مەن ءماسليحات قابىلدادى. جاڭا اتاۋلار الاتاۋ، اۋەزوۆ، بوستاندىق، جەتىسۋ، مەدەۋ، ناۋرىزباي جانە تۇركسىب اۋداندارىنداعى كوشەلەرگە بەرىلدى.
الاتاۋ اۋدانىنداعى «نۇركەنت» پەن «بوتاگوز» شاعىناۋداندارىنىڭ اراسىنداعى 2-كوشە ەندى ۆەتنامنىڭ مەملەكەت قايراتكەرى حو شي ءميننىڭ ەسىمىمەن اتالادى. ال بوستاندىق اۋدانىندا پرەزيدەنت پاركى ماڭىنداعى «ارحات» شاعىناۋدانىنىڭ 7-كوشەسىنە قازاقستاندىق مانەرلەپ سىرعاناۋشى دەنيس تەننىڭ ەسىمى بەرىلدى.
سونىمەن قاتار قالادا تەاتر رەجيسسەرى ناتاليا ساتستىڭ، اۋىر اتلەتيكادان وليمپيادا چەمپيونى اناتولي حراپاتىيدىڭ، جازۋشى ءابدىجامىل نۇرپەيىسوۆتىڭ، ارحەولوگ كارل بايپاقوۆتىڭ، ابايتانۋشى قايىم مۇحامەدحانوۆتىڭ جانە ءتىلشى-عالىم رابيعا سىزدىقتىڭ ەسىمدەرى بەرىلگەن كوشەلەر پايدا بولدى.
اكىمدىك شەشىمىمەن بىرقاتار كوشەگە تاريحي جانە گەوگرافيالىق اتاۋ دا بەرىلدى. ولاردىڭ قاتارىندا جاڭاتاس، سەمەي، جاڭاوزەن، اقتاۋ، شاردارا، قورعاس، كەگەن، قىزىلقۇم، بالاساعۇن، بوزجىرا، شولاققورعان جانە باسقا دا اتاۋ بار.
«كوشەلەرگە اتاۋ بەرۋ تۋرالى شەشىم 2025 جىلعى 8 شىلدەدەگى قالالىق ونوماستيكا كوميسسياسىنىڭ جانە 2025 جىلعى 10 قىركۇيەكتەگى رەسپۋبليكالىق ونوماستيكا كوميسسياسىنىڭ قورىتىندىلارى نەگىزىندە، سونداي-اق تۇرعىنداردىڭ پىكىرى ەسكەرىلە وتىرىپ قابىلداندى»، – دەلىنگەن قۇجاتتا.
بۇعان دەيىن الماتى قالاسىنىڭ بىرقاتار تۇرعىنى روزىباكيەۆ كوشەسىن مۇحتار شاحانوۆقا اۋىستىرۋ تۋرالى پەتيتسيا جاريالاعان ەدى.
