سولتۇستىك قازاقستان وبلىسىنىڭ تۇرعىنى دانيال عالي اسكەري بورىشىن وتەۋگە دەنى ساۋ كۇيىندە كەتسە، جارتى جولدا ۇيىنە اۋىر دەرتپەن ورالعان، دەپ حابارلايدى "ادىرنا" ۇلتتىق پورتالى ينفورمبيۋروعا سىلتەپ.
ۇلتتىق ۇلاننىڭ 6637 اسكەري بولىمىندە قىزمەت ەتكەن جاس جىگىت اسكەردەگى ارتىق سالماقتى جۇكتەمە مەن كومانديرلەردىڭ جاۋاپسىزدىعى قانت ديابەتىنە شالدىقتىرۋعا سەبەپ بولدى دەپ ەسەپتەيدى.
دانيالدىڭ سوزىنشە، ول اسكەردە ءتورت تاۋلىكتە بار بولعانى 20 ساعات قانا ۇيىقتاعان. ۇزدىكسىز كۇيزەلىس پەن شارشاۋ العاشقى بەلگىلەردىڭ پايدا بولۋىنا اكەلگەنىمەن، اسكەري دارىگەرلەر ونىڭ جاعدايىنا دەر كەزىندە كوڭىل بولمەگەن.
«اياعىم دىرىلدەپ تۇرسا دا، ايتقانىمدى ەلەمەدى. التى اي بويى ناقتى دياگنوز قويىلمادى. تۇماۋ دەپ ءجۇرىپ، جاعدايىمدى اسقىندىرىپ جىبەردى»، – دەيدى ول.
ينفورمبيۋرو مالىمەتىنشە، جىگىت جارتى جىل بۇرىن مەرزىمىنەن بۇرىن ۇيىنە جىبەرىلگەن. سودان بەرى قانت ديابەتىمەن كۇرەسىپ، قىرۋار قاراجاتتى ءدارى-دارمەككە جۇمساپ كەلەدى. اناسىمەن بىرگە اسكەري ءبولىم باسشىلىعىن سوتقا بەرىپ، مورالدىق شىعىندى وتەۋدى تالاپ ەتۋدە.
اناسى دينارا ىسقاقوۆانىڭ ايتۋىنشا، ۇلى اسكەري قىزمەتكەر بولۋدى ارمانداپ، ءوز ەركىمەن بورىشىن وتەۋگە اتتانعان.
«ۇلىم اسكەرگە ساۋ باردى، بىراق اۋرۋ بولىپ قايتتى. وسى دەرتپەن كۇرەسۋ ءۇشىن قانشا قاراجات پەن كۇش كەتىپ جاتىر. اسكەريلەردىڭ جاۋاپسىزدىعىنان نەگە ءبىز قينالۋىمىز كەرەك؟»، – دەيدى ول.
ال اسكەري ءبولىم باسشىلىعى وزدەرىنە تاعىلعان ايىپپەن كەلىسپەيدى. مەديتسينالىق جابدىقتار مەن ماماندار جەتىسپەيتىنىن مويىنداعانىمەن، ساربازعا بارلىق قاجەتتى كومەكتى كورسەتكەندەرىن ايتادى.
«اۋرۋىنىڭ اسقىنۋىنا ءبىزدىڭ قاتىسىمىز جوق. ساربازداردا ۇيقى جەتىسپەيدى دەگەنمەن كەلىسپەيمىن. بارلىعى 8 ساعات دەمالادى»، – دەدى "ورتالىق" وڭىرلىك قولباسشىلىعى مەديتسينالىق باسقارماسىنىڭ باستىعى راشيت ءابىلماجىنوۆ.
اقمولا گارنيزونىنىڭ اسكەري سوتى اتا-انانىڭ تالابىن ءىشىنارا قاناعاتتاندىرىپ، مورالدىق شىعىن مولشەرىن 300 مىڭ تەڭگە دەپ بەلگىلەدى. الايدا بۇل شەشىمگە كوڭىلى تولماعان دانيالدىڭ تۋىستارى اپەللياتسياعا شاعىم تۇسىرمەك.
