استانا قالاسىنىڭ 20 جىلدىعىنا ارنالعان «ازيا جاڭعىرىعى» حالىقارالىق تسيرك ونەرى فەستيۆالىنە قاتىسۋشىلار الماتىدا مەرەكەلىك قويىلىم ۇسىندى. وندا الەمنىڭ ءار قيىرىنان كەلگەن تانىمال تسيرك ۇجىمدارى ونەر كورسەتتى. قازاق مەملەكەتتىك تسيركىندەگى مەرەكەلىك قويىلىمدا – نيكاراگۋا،رەسەي، بەلارۋس، ۋكراينا، وزبەكستان جانە قىرعىزستاننىڭ تانىمال تسيرك مايتالماندارى ونەر كورسەتتى. الەمنىڭ ەڭ ۇزدىك ونەرپازدارىنىڭ بىرەگەي تۋىندىلارى ايلالى امالدار مەن قاۋىپتى قيمىلدارعا قۇرىلعان.
الەنا كليموۆيچ، بەلارۋس مەملەكەتتىك تسيركىنىڭ وكىلى:
- مەن بەلارۋس ەلىنەن كەلىپ الماتى تسيركىندە ونەر كورسەتىپ جاتىرمىن. ءبىز قاۋىپپەن كۇن سايىن بەتپە-بەت كەلەمىز. دەگەنمەن، شەبەرلىگىمىز شىڭدالعانىمەن پاتشا كوڭىلدى كورەرمەندى ءبىر ساتكە بولسا دا ۋايىمىنان ارىلتىپ، قۋانىشقا كەنەلتۋ ءۇشىن تاۋەكەلگە بارامىز. تالابى بولسا ادامدى ونەرگە باۋلۋ اسا قيىن ەمەس. ال، جىرتقىشتىڭ ءتىلىن تاۋىپ، ايتقانىڭا كوندىرۋ قيىننىڭ قيىنى. وسى كورىنىسكە كۋا بولعان كوپشىلىك ونەرپازداردىڭ ەرلىگىنە ءتانتى بولدى.
مارجان شارىپحانقىزى، قالا تۇرعىنى:
- بۇگىن بالالاردى تسيرككە الىپ كەلدىك، ءبارى ۇنادى. بارىستى، يتتەردى، قۇستاردى كوردى. وتە جاقسى، ءبارى كوڭىلىمىزدەن شىقتى. باسقا تسيركتەن ەرەكشەلىكتەرى سول ءار ەلدەن قوناقتار كەلدى. بىشكەكتەن كەلدى، وزبەكستاننان كەلدى.
الماتى تسيركى مانەجىنىڭ كوگىندە قۇستاي قالىقتاعان تسيرك ونەرىنىڭ حاس شەبەرلەرى جاسقا دا، جاسامىسقا دا ەرەكشە اسەر سىيلادى. جونگلەرلاردىڭ قالجىڭىنا ىشەكتەرى تۇيىلگەنشە كۇلگەن كوپشىلىك، اۋە اكروباتتارىنىڭ قاۋىپتى ارەكەتتەرىن كورىپ قورقىنىش سەزىمىنە بولەندى. وسىلايشا، دەمدە قۋانىپ، ارتىنشا ۇرەي قۇشاعىنا ەنگەن كورەرمەن ەرتەگىلەر الەمىنە ەنىپ كەتكەندەي كۇي كەشتى. تسيرك كورەرمەنگە ونەر بولسا، جان-جانۋارلار مەن ولاردى ۇيرەتۋشى ماماندار ءۇشىن ءومىر. سوندىقتان، الەمنىڭ ەڭ مىقتى تسيرك ونەرپازدارىنىڭ شەبەرلىك ارەكەتى مەن قالجىڭعا تولى قيمىلدارىن كورىپ، ونەرمەن ۇشتاسقان ءومىر تۋرالى بىلگىڭىز كەلسە قاپى قالماڭىز. ەلوردانىڭ 20 جىلدىعىنا ارنالعان تسيرك قويىلىمى مەگاپوليستە 19 تامىزعا دەيىن جالعاسادى.
نۇرلان اسقارۇلى
