قازاقستاندا Mellstroy لاقاپ اتىمەن تانىمال بەلارۋس ستريمەرى اندرەي بۋريمگە ىزدەۋ جاريالاندى. بۇل اقپارات باس پروكۋراتۋرانىڭ قۇقىقتىق ستاتيستيكا جانە ارنايى ەسەپتەر پورتالىندا پايدا بولدى، دەپ حابارلايدى «ادىرنا» ءتىلشىسى.
پورتالداعى مالىمەتكە سايكەس، بۋريمگە قاتىستى ىزدەۋ ءىسى 15 قاراشادا تىركەلگەن. باستاماشى ورگان — قارجىلىق مونيتورينگ اگەنتتىگى، ال ىزدەۋدى استانا قالاسى بويىنشا ەكونوميكالىق تەرگەۋ دەپارتامەنتى جۇرگىزەدى.
بلوگەرگە نە سەبەپتى ىزدەۋ جاريالانعانى ازىرگە بەلگىسىز.
ايتا كەتەيىك، ءبۋريمنىڭ Instagram جەلىسىندە 3 ميلليوننان استام، ال Telegram-دا 928 مىڭ جازىلۋشىسى بار. ول تمد كەڭىستىگىندە «ترەش-ستريمەر» رەتىندە تانىمال. بۇل جانرداعى كونتەنت كوبىنە قورقىنىش تۋدىراتىن، ارانداتۋشىلىققا تولى جانە كەيدە شەكتەن شىعاتىن ارەكەتتەرگە نەگىزدەلەدى.
قاراشا ايىنىڭ باسىندا Mellstroy-دىڭ جەلىدەگى ارنالارىن بەلارۋس ەكسترەميستىك دەپ تانىعان ەدى.
