دەنساۋلىق ساقتاۋ مينيسترلىگىنە قاراستى مەديتسينالىق جانە فارماتسەۆتيكالىق باقىلاۋ كوميتەتى ەكىباستۇزداعى بىرقاتار مەديتسينالىق ۇيىمداردى تەكسەرۋدى باستادى، دەپ حابارلايدى "ادىرنا" ۇلتتىق پورتالى.
تەكسەرىس 40 جاستاعى ەر ادامنىڭ قازاسىنان كەيىن باستالعان. ناۋقاس تىزەسىنە جاسالعان ەكپەدەن كەيىن ءتورتىنشى كۇنى كوز جۇمدى.
ۆەدومستۆونىڭ رەسمي سايتىندا جاريالانعان مالىمەتكە سايكەس، تەكسەرىس پاۆلودار وبلىستىق دەپارتامەنتى جانە تاۋەلسىز ساراپشىلار — تەراپەۆت، انەستەزيولوگ-رەانيماتولوگ جانە تراۆماتولوگتىڭ قاتىسۋىمەن جۇرگىزىلىپ جاتىر.
«پاۆلودار وبلىسى بويىنشا دەپارتامەنت قۇرامىنا تاۋەلسىز مامانداردى تارتا وتىرىپ، ەكىباستۇز پوليتسياسى تەرگەۋ ءبولىمىنىڭ قاۋلىسىنا سايكەس پاتسيەنتتىڭ قوزعالىس مارشرۋتى بويىنشا مەديتسينالىق ۇيىمداردا تەكسەرىس جۇرگىزۋدە»، — دەلىنگەن حابارلامادا.
كوميتەت انىقتالعان زاڭبۇزۋشىلىقتار بولعان جاعدايدا ماتەريالدار ەكىباستۇز قالالىق پوليتسيا باسقارماسىنىڭ تەرگەۋ بولىمىنە بەرىلەتىنىن، ولار قۇقىقتىق باعا بەرىپ، پروتسەسسۋالدىق شەشىم قابىلدايتىنىن مالىمدەدى.
ايتا كەتەيىك، مارقۇم جەڭىس بەكجىگىتوۆ 8 قىركۇيەكتە ەكىباستۇزداعى جەكە حيرۋرگيالىق ورتالىققا تىزە بۋىنىنداعى اۋىرسىنۋعا بايلانىستى جۇگىنگەن. ۋلترادىبىستىق تەكسەرۋدەن كەيىن وعان وڭ تىزە بۋىنىنداعى وستەوارتريت دياگنوزى قويىلىپ، 10 قىركۇيەكتە بۋىن ىشىنە ينەكتسيا جاسالعان.
كەلەسى كۇنى ەر ادامنىڭ اياعى ءىسىپ، قاتتى اۋىرسىنۋ پايدا بولعان. تۋىستارىنىڭ ايتۋىنشا، ونىڭ قىزۋى كوتەرىلىپ، قىسىمى تومەندەپ، ءتىپتى ەسىنەن تانىپ قالعان. جەدەل جاردەم قىزمەتى ناۋقاستى اۋرۋحاناعا جاتقىزۋدان باس تارتقاندىقتان، تۋىستارى 13 قىركۇيەكتە ونى ءوز كۇشىمەن كلينيكاعا جەتكىزەدى.
كەشكىسىن كلينيكانىڭ باس دارىگەرى مارقۇمنىڭ تۋىستارىنا مەديتسينالىق ۇيىمنىڭ جاساندى تىنىس الدىرۋ اپپاراتى جوق ەكەنىن ايتىپ، ناۋقاستىڭ ەكىباستۇز قالالىق اۋرۋحاناسىنىڭ رەانيماتسياسىنا اۋىستىرىلعانىن جەتكىزگەن. الايدا ەر ادام كەلەسى كۇنى كوز جۇمدى.
قازىر ونىڭ ولىمىنە ناقتى نە سەبەپ بولعانىن انىقتاۋ ءۇشىن تەرگەۋ امالدارى جۇرگىزىلىپ جاتىر.
